Футбол мухлислари ФИФА устидан Европа Комиссиясига шикоят қилди

Европа футбол мухлислари Жаҳон чемпионати чипталари нархи юзасидан ФИФА устидан Европа Комиссиясига расмий шикоят киритди. Мазкур мурожаат «Европа футбол мухлислари» (FSE) ташкилоти ва «Euroconsumers» истеъмолчилар гуруҳи томонидан амалга оширилди.

Шикоятда таъкидланишича, ФИФА ўз мавқеини суиистеъмол қилиб, чипталарга асоссиз равишда юқори нархлар белгиламоқда.

Чипталар нархи ва янги тизим

Маълумотларга кўра, гуруҳ босқичи ўйинлари учун чипталар 140 доллардан бошланади, финал учун эса 8 680 долларгача етади. Финалнинг энг арзон чиптаси ҳам 4 185 доллар этиб белгиланган.

Бироқ бу нархлар якуний эмас ва ўзгариши мумкин, чунки ФИФА АҚШ, Канада ва Мексикада ўтказиладиган Жаҳон чемпионатида тарихда илк бор талабга қараб ўзгариб турадиган «динамик нарх белгилаш» тизимини жорий қилмоқда.

Декабр ойида мухлисларнинг кескин норозиликлари ортидан, ФИФА баъзи чипталар нархини финалгача бўлган барча босқичлар учун 60 долларгача туширишга мажбур бўлди. Бу чипталарни жамоалар ўзларининг энг содиқ мухлисларига тарқатишлари мумкин эди.

Мухлислар танқиди ва талаблар

Юқори нархлардан ташқари, FSE ташкилоти ФИФАни харидорларга босим ўтказиш орқали сотиш усулларидан фойдаланганликда айблади ва жараённинг шаффоф эмаслигини танқид қилди.

Ташкилот апрел ойида бўлиб ўтадиган навбатдаги сотув босқичида нархларни музлатиб қўйишни ҳамда Европадаги мухлисларга чипта сотишда «динамик нарх белгилаш» амалиётини тўхтатишни талаб қилмоқда.

«Динамик нарх белгилаш мухлисларнинг садоқатини кимошди савдосига айлантириб юборади, ҳеч қандай қўшимча қулайликларсиз харажатларни оширади ва кўплаб ишқибозларни ўйиндан четда қолдиради», — деди «Euroconsumers»нинг сиёсат ва ижро бўйича раҳбари Элс Брюггеман.

ФИФА позицияси ва қайта сотиш масаласи

ФИФА президенти Жанни Инфантино январ ойида чипталарга бўлган талаб «бир вақтнинг ўзида 1000 йиллик жаҳон чемпионатлари» талабига тенг эканини айтган эди. Унинг сўзларига кўра, Жаҳон чемпионатидаги барча 104 та ўйиннинг чипталари тўлиқ сотилади, бу эса «чипталар эҳтимол янада қимматроқ нархларда қайта сотилишини» англатади.

FSE шунингдек, ФИФАнинг расмий қайта сотиш платформасини ҳам танқид қилмоқда. Ушбу платформада чипталар ўз асл баҳосидан анча қиммат нархларда сотувга қўйилган ва ташкилот ҳар бир сотувдан 30 фоиз улуш олади.