General «Gorilla» Eronga qarshi urushga tayyorgarlikni boshlab yubordimi?

«Gorilla» laqabi bilan mashhur Erik Kurilla Markaziy qo‘mondonlik rahbari sifatida Yaqin Sharqda AQSH kuchlarini to‘plash va joylashtirishda yetakchi qarorlar qabul qilmoqda. Politico manbasiga ko‘ra, yangi mudofaa vaziri Pit Hegset unga misli ko‘rilmagan vakolatlar bergan. General Kurillaning faqat so‘roviga asosan hududga ikkinchi aviatashuvchi, F-16, F-22 va F-35 kabi zamonaviy qiruvchi uchoqlar yuborildi. Bu AQSH tarixida kamdan kam kuzatiladigan holat — ikki aviatashuvchi kema bir vaqtda Yaqin Sharqda joylashtirildi. Qo‘shma Shtatlar Eronning yadro dasturini to‘xtatish maqsadida turli harbiy variantlarni ishlab chiqmoqda. Kurilla esa Tramp va Hegsetga shu yo‘nalishda keng doirali harakat rejalarini taqdim etgan. Uning fikricha, hozirgi vaziyatda keskin choralar kerak va u buni faqat harbiy yo‘l bilan hal etish mumkin, deb hisoblaydi. Shu bilan birga, Pentagonning boshqa yuqori martabali shaxslari — generalissimus Den Keyn va siyosiy rahbar Elbrij Kolbi ehtiyotkorlikka chaqirmoqda. Ammo ularning fikri Kurillaning bosimli strategik harakatlari fonida kamroq eshitilmoqda. Hatto diplomatlar ham Hegset uning pozitsiyasini doim qo‘llab-quvvatlayotganini ta’kidlamoqda. AQSH harbiylarining shiddat bilan ko‘chirilishi Isroil tomonidan 13 iyunga o‘tar kechasi amalga oshirilgan yirik havo hujumlaridan keyin yuzaga keldi. Ushbu hujumlar natijasida Eron rasmiy manbalariga ko‘ra, 585 kishi halok bo‘lgan, 1326 nafar kishi yaralangan. Eron javoban Isroil hududiga ballistik raketalar yo‘lladi, 24 kishi halok bo‘ldi, 800 nafarga yaqini yaralandi. Hozirda AQSH Turkiyani ham o‘z safiga jalb qilmagan holda, Eronga qarshi harakatlarni faollashtirmoqda. AQSH rasmiylari bu harakatlarni himoyaviy deb baholasa-da, qurolli kuchlarning bunday darajada to‘planishi yangi mojaroga tayyorgarlik belgisi sifatida qabul qilinmoqda.