Германия «Росатом» билан қўшма ядровий лойиҳага «яшил чироқ» ёқди
Германия ҳукумати Россиянинг «Росатом» давлат корпорацияси билан тўғридан тўғри ҳамкорликни назарда тутувчи баҳсли саноат ташаббусини маъқуллади. Лойиҳа Германиянинг Қуйи Саксония ерида амалга оширилади.
Экологик ва урушга қарши ташкилотларнинг кескин норозиликларига қарамай, ташаббус тегишли текширувлар ўтказилгандан сўнг федерал ҳукумат томонидан дастлабки тасдиқни олди. Бу ҳақда «Politico» нашри хабар берди.
Келишувнинг моҳияти
Лойиҳа ташаббускори «Advanced Nuclear Fuels GmbH» компанияси бўлиб, у Франциянинг давлат энергетика гиганти «Framatome»нинг шўъба корхонаси ҳисобланади. Компания Германиянинг Линген шаҳридаги заводида Россия чизмалари асосида ядровий ёқилғи элементларини ишлаб чиқаришни йўлга қўймоқчи.
Бунинг учун француз томони Россиянинг «Росатом» корпорациясига қарашли шўъба тузилма – «TVEL» билан ҳамкорлик қилади ва ундан тегишли лицензия сотиб олишни режалаштирмоқда.
Германия федерал идоралари, жумладан Атроф-муҳит вазирлиги ҳамда миллий хавфсизлик органлари яқинда ушбу ташаббус бўйича экспертиза баҳосини якунлади. Текширув натижаларига кўра, Берлин лойиҳани амалга оширишга рухсат беришга қарор қилди, бироқ муайян чекловлар билан.
Энди сўнгги қарор Қуйи Саксония ерининг Атроф-муҳит вазирлигига боғлиқ. У якуний қарорни қабул қилиш учун марказий ҳукуматдан сиёсий рухсат кутаётган эди.
Жосуслик хавфими ёки энергетик хавфсизлик?
Қўшма ишлаб чиқариш режалари жамоатчиликда кескин норозилик уйғотди. Фаоллар ва экологларнинг таъкидлашича, Россиянинг Украинага қарши тўлиқ кўламли уруши ва Европа миқёсида Москвадан энергетик мустақилликка интилиш фонида Россия давлат компанияларига Германиядаги стратегик объектларга кириш имконини бериш диверсия ва саноат жосуслиги хавфини келтириб чиқаради.
Ўз навбатида, Франциянинг «Framatome» компанияси раҳбарияти бизнес-режани ҳимоя қилмоқда. Расмий баёнотда қайд этилишича, лойиҳа «ёқилғи тўпламлари билан мустақил Европа таъминоти»ни таъминлайди ва электр энергияси етказиб беришдаги узилишлар ҳамда ЕИдан ташқари импортга қарамликнинг олдини олади.
Компанияда таъкидлашларича, Россия лицензиялари асосида ёқилғини Германия заводида йиғиш фақат мажбурий вақтинчалик чора ҳисобланади. Бу Европа муҳандислари совет типидаги реакторлар (сув-сув энергетик реакторлари) учун Россия технологияларига муҳтож бўлмаган ўз ёқилғи тўпламларини ишлаб чиққунга қадар ўтиш босқичи бўлиши керак.
