Shubhasiz, haftaning eng muhim voqeasi «Sea Breeze Uzbekistan» bo‘yicha hukumat qarori bo‘ldi. 1 avgust kuni imzolangan hujjatda Jamoatchilik orasida katta muhokamalarni keltirib chiqargan loyihani amalga oshirish shartlari belgilandi
Qarorga ko‘ra, Toshkent viloyati Bo‘stonliq tumani hududidagi 577 ga yer maydonida qiymati 5 mlrd AQSH dollarini tashkil etadigan umummavsumiy kurort majmuasini barpo etish bo‘yicha yirik investitsiya loyihasini amalga oshirish yuzasidan Ozarboyjonning «Agalarov Development» MCHJ ishtirokida «Sea Breeze Uzbekistan» MCHJ qo‘shma korxonasining takliflari eng yaxshi taklif sifatida tanlab olingan. Qizig‘i, hukumat qarori 1 avgust kuni e’lon qilingan bo‘lsa, Qo‘shma korxona 4 avgust kuni davlat ro‘yxatidan o‘tgani ma’lum bo‘ldi.
Hukumat qarorida «Sea Breeze Uzbekistan» MCHJ QKga loyihani amalga oshirish bo‘yicha bir qator huquq va vazifalar ham belgilangan.
Jumladan, loyiha qurilishida Chorvoq suv omboriga bir tomchi ham oqova suv tushirilmasligi shart etib belgilandi. Qurilish va va loyiha ishga tushgandan keyin chiqindi hamda oqova suvlarni Chirchiq shahri oqova suvlarni tozalash inshootiga yo‘naltirish choralarini ko‘rish «Sea Breeze Uzbekistan» MCHJning asosiy majburiyatlaridan biri etib belgilanadi. Bunda ushbu talabga rioya etmaslik loyihani to‘xtatishga va yerga bo‘lgan ijraga huquqining bekor qilinishiga asos bo‘ladi.
Loyihani amalga oshirishda buziladigan har qanday xususiy mulk ob’ektlari, shu jumladan, dala hovlilar va mulkchilikning boshqa shakllari kompensatsiyalanadi.
Yashil maydonlar ekologik va estetik qiymati darajasiga ko‘ra tasniflanadi va eng muhim namunalarga nisbatan kesish emas, balki ko‘chirib o‘tkazish choralari ko‘riladi.
«Sea Breeze Uzbekistan» Chorvoq turistik zonasi ishtirokchisi sifatida erkin iqtisodiy zona maqomini oldi. Bu unga O‘zbekistondagi maxsus iqtisodiy zonalar to‘g‘risidagi qonunlarga muvofiq barcha soliq va bojxona imtiyozlaridan foydalanish huquqini beradi.
Loyiha amalga oshirilishi davomida «Sea Breeze Uzbekistan» chetdan olib kiriladigan uskunalar va qurilish materiallari uchun qo‘shimcha xarajat qilmaydi. Bu esa Chorvoq hududida yirik turistik infratuzilma qurilishini tezlashtirishi va sarmoya miqdorini sezilarli darajada qisqartirishi kutilmoqda.
Tonirovka arzonlashdimi yoki yangi to‘lov bilan qimmatlashdimi?
Yangi qarorga ko‘ra, yoz oylarida avtooyna qoraytirishga imtiyozlar berildi. Ammo shunday sharoitda — ortiqcha to‘lov va tushunmovchiliklar ham paydo bo‘ldi. Yangilik nimada va nima o‘zgardi — hozir ko‘rib chiqamiz.
Vazirlar Mahkamasi qarorlariga asoslangan yangi tartibga ko‘ra, endi O‘zbekistonda har yili 1 maydan 31 avgustgacha M1 toifasiga kiruvchi avtotransport vositalari (bular o‘rindiqlar soni 8 tadan oshmaydigan yengil avtomobillar) uchun yoz oylarida orqa va old yon oyna shishalarini qoraytirishga yengilliklar beriladi.
Yoz oylarida tonirovka qilish uchun jismoniy va yuridik shaxslardan 1 BHM — ya’ni 412 ming so‘m to‘lov undiriladi. To‘lov ruxsatnoma rasmiylashtirilgan sanaga bog‘liq bo‘lmaydi, to‘rt oy uchun to‘liq bir martada amalga oshiriladi.
Bu mudatdan boshqa vaqtlarda quyidagicha narx amal qiladi:
- Orqa yon oynalar va orqa oyna — bepul
- Old eshiklar oynalari — bazaviy hisoblash miqdorining 8 barobari, ya’ni 3 mln 296 ming so‘m.
Buni hamma old eshik oynalarini tonirovka qilish arzon bo‘ldi, deb tushunmoqda. Aslida esa, yengil moshinaning orqa eshigi oynalarini tonirovka qilish shu paytgacha yil bo‘yi tekin edi. Endi yozning jaziramasida 4 oy uchun 412 ming so‘m to‘lanadi. Bonusiga shu muddat ichida old eshik oynalarini ham qoraytirishga ruxsat beriladi.
Alisher Qodirov: «Yalang‘ochlikni dunyoviylik deb qabul qildik, endi yopinib yurish huquqiga daxl qilmaslikni ham o‘rganaylik»
7 avgust kuni «Bunyodkor» stadionida jahon yulduzi Jennifer Lopsning konserti bo‘lib o‘tdi. «Milliy tiklanish» demokratik partiyasi raisi jahon yulduzi Jennifer Lopesning Toshkentdagi konserti va mamlakatda diniy bag‘rikenglik masalalari haqida fikrlarini bildirdi. Partiya raisi o‘z telegram kanalida ulashgan postida O‘zbekistonning dunyoviy davlat ekanini ta’kidlab, «Dunyoviy davlat ko‘pchilik saylagan Parlament tomonidan qabul qilinib, ko‘pchilik saylagan Prezident tomonidan maqullangan qonunlarni buzmagan holda, o‘zi istaganidek yashash imkonini berishini ta’kidladi.
Qodirovning yozishicha, Jenifer Lopesning konserti serdaromad ish va yopiq tadbir, narkotika tarqatib, davlatga qarshi targ‘ibot qilmasa, o‘tkaziladi, tanasini ko‘rsatish uni tanlovi, ko‘rish esa tadbirga bilet olganlarniki, dunyoviylik shu.
Shuningdek, u o‘ranib yurmoqchi bo‘lgan ayol vatandoshni ham tanlovi qonun bilan himoya qilinishi kerakligini ta’kidladi.
«Yalong‘och namoyishini dunyoviylik deb qabul qildik, endi yopinib yurish huquqiga ham daxl qilmaslik kerakligini qabul qilaylik. Lopesga qanday kiyinishni o‘rgatmaganimizdek, e’tiqodli ayollarimizga ro‘molni qanday o‘rashni o‘rgatishni, qolaversa, shu yoshga kelib e’tiqodi talabiga rioya qilgan ayollarni pasportga ro‘molini yechib tushishga majburlashni ham to‘xtatish kerak. Identifikatsiya talablari yuzni ochiq bo‘lishini taqozo qiladi, sochni emas. Lopesga ko‘rsatgan bag‘rikengligimizni dindor ayollarimizga ham ko‘rsataylik. – deb yozdi Alisher Qodirov.
O‘qituvchilar «remont»ga jalb qilindi
Andijon viloyati Marhamat tumanidagi 42-maktabda mehnat ta’tilidagi o‘qituvchilar devor oqlash va ta’mirlash ishlariga jalb etilgani videosi tarqaldi. Boshqarmaga ko‘ra, maktab jamoasi ishlarni ixtiyoriy qilganini aytgan, ammo direktor Z.M. bu holatni nazorat qilmagani uchun ishdan olindi.
Davlat mehnat inspeksiyasi o‘rganish olib borib, o‘qituvchilar majburiy mehnatga jalb qilinganini tasdiqladi. Direktorga 41,2 million so‘m miqdorida jarima tayinlandi.
Keyinroq Samarqand shahridagi 24-maktbadga ham ayol o‘qituvchilar ta’til chog‘ida maktab ta’miriga jalb etilgani to‘g‘risida xabarlar tarqaldi. Demak, maomma hamon tizimli tus olgan.
Yangi cheklov: Ayrim migrantlarning Rossiyaga kirishi umrbodga taqiqlanishi mumkin
Rossiya Davlat dumasidagi «Adolatli Rossiya – Haqiqat uchun» fraksiyasi deputatlari og‘ir jinoyatlar bo‘yicha sudlangan migrantlarga Rossiyaga kirishni umrbodga taqiqlovchi qonun loyihasini parlamentga taqdim etdi.
Partiya matbuot xizmati ma’lumotiga ko‘ra, mazkur qonun loyihasi Davlat dumasi ko‘rib chiqishi uchun 4 avgust kuni kiritilgan.
Loyihada og‘ir jinoyat sodir etgan xorijliklar va fuqaroligi bo‘lmagan shaxslarga, sudlanganlik holati tugatilgan bo‘lsa ham, Rossiyaga umrbod kirish taqiqlanishi ko‘zda tutilgan. Qoidalar jinoyat qayerda sodir etilganiga bog‘liq bo‘lmaydi.
Taklif etilgan choralar qabul qilinsa, migrantlar orasidagi potensial jinoyatchilarning mamlakatga kirishiga mutlaqo yo‘l qo‘yilmaydi.
Rekord natija: Ota o‘z xohishi bilan 2,2 mlrd so‘m alimentni oldindan to‘ladi
Nukus shahrida yashovchi ota farzandining 18 yoshgacha bo‘lgan alimentini bir yo‘la oldindan to‘lab berdi. Fuqarolik ishlari bo‘yicha sud qaroriga ko‘ra, fuqaro sobiq turmush o‘rtog‘iga farzandi ta’minoti uchun aliment to‘lashi kerak edi. U Majburiy ijro byurosiga murojaat qilib, kelgusi 13 yil uchun belgilangan 2 milliard 270 million so‘mlik alimentni birdaniga to‘lash istagini bildirgan.
O‘zbekiston hukumati qaroriga muvofiq, bunday to‘lovlar oldindan amalga oshirilishi mumkin. Ayol esa byuroga kelib, ushbu to‘lovni olganini tasdiqlagan. Bu — MIB tarixidagi eng yirik aliment to‘lovi bo‘lib qolmoqda.
Ma’lumot uchun, 2023 yilda 5697 kishi, 2024 yilda esa 8833 kishi aliment to‘lashdan bo‘yin tovlagani uchun ma’muriy javobgarlikka tortilgan. 2024 yilda sudlar tomonidan 1109 ta ayblov hukmi chiqarilgan.
Ko‘kdalada gaz shoxobchasida portlash qurbonlari soni ortdi
16 iyul kuni Qashqadaryo viloyati, Ko‘kdala tumanida gaz shoxobchasida sodir bo‘lgan portlashda 10-sinf o‘quvchisi Dilnoza jarohat olib, 20 iyulgacha komada bo‘lgan va vafot etgan. Shu bilan halok bo‘lganlar soni 6 nafarga yetgan.
Daryo.uzning jurnalistik surishtiruvda malum bo‘lishicha, portlash sodir bo‘lgan paytdayoq qurbonlar soni besh nafarni tashkil etgani haqida mahalliy aholi guvohlik bergan. Ular rasmiylar tomonidan e’lon qilingan to‘rt nafar halok bo‘lgan, degan bayonotni «yolg‘on» deb atagan.
Rasmiylar esa bu o‘limni beshinchi qurbon sifatida qayd etmoqda. Fojea bo‘yicha jinoyat ishi qo‘zg‘atilgan. Halok bo‘lganlarning oilalariga 100 mln so‘mdan, jarohatlanganlarga 50 mln so‘mdan yordam berildi.
Chilonzorni яланғоч kezgan fuqaro
7 avgust kuni Chilonzor tumanida 2006 yilda tug‘ilgan fuqaro mast holda yalang‘och 19-mavzeda harakatlangan. Bu holat atrofdagilarning e’tiroziga sabab bo‘ldi.
Ichki ishlar ma’lumotiga ko‘ra, u ko‘p qavatli uy oldida uxlab yotgan paytda profilaktika inspektori tomonidan aniqlangan. Unga nisbatan “mayda bezorilik” moddasi bo‘yicha ma’muriy bayonnoma tuzildi va hujjatlar tuman sudiga yuborildi.
Videoni Youtubeʼda tomosha qiling:
👉https://youtu.be/VYtP9f70XL4
