Ҳарбий хизматчиларга олийгоҳда онлайн ўқиш имконияти яратилади ва китобхонларига электромобил берилади

Ҳарбий хизматчиларни китобхонликка қизиқишини янада ошириш, бу борада уларни қўллаб-қувватлаш ҳамда рағбатлантириш мақсадида жорий йилдан бошлаб, ҳар йили Қуролли Кучларнинг барча тоифадаги ҳарбий хизматчилари ўртасида тўрт босқичли «Маънавият қалқони» республика китобхонлик танлови ўтказилади. Бу ҳақдаги таклиф Президент Шавкат Мирзиёев томонидан маъқулланди.

Қайд этилишича, танловнинг биринчи босқичи ҳарбий қисм ва ҳарбий таълим муассасаларида, иккинчи босқичи ҳарбий округ, бирлашма ва қўшилмаларда, учинчи босқичи Қуролли Кучлар таркибидаги вазирлик ва идораларда ўтказилади. Якуний республика босқичида саралаш босқичларининг ғолиби бўлган ҳарбий хизматчилар ўзаро беллашади. Якуний босқичнинг 4 нафар ғолиби Қуролли Кучлар Олий Бош Қўмондонининг бош соврини – замонавий электромобиль ҳамда диплом билан тақдирланади. Совринли ўринларни эгаллаган ҳарбий хизматчилар пул мукофотлари ва дипломлар билан рағбатлантирилади.

Бундан ташқари, 2026-2027 ўқув йилидан бошлаб муддатли ҳарбий хизматга чақирилган ёшларга бир қатор имтиёз ҳамда кафолатлар берилиши назарда тутилмоқда.

Энди муддатли ҳарбий хизматчилар учун ҳарбий хизмат даврида олийгоҳларга ўқишга кириб, масофавий таълим олиш имконияти яратилмоқда. Бу жараёнда аскарлар учун таълим ташкилотлари билан ҳамкорликда ҳарбий қисмларда абитуриентларни тайёрлаш курслари ташкил этилиб, олийгоҳларнинг кириш имтиҳонларига тайёрлаш тизими йўлга қўйилади.

Энг муҳими, олий таълим муассасаларига қабул қилинган аскарлар ҳарбий факултетлар талабаларига тенглаштирилиб, ўқишни тамомлагандан сўнг уларга захирадаги лейтенант ҳарбий унвони берилади.

Шу билан бирга, намунали хизмат ўтаган, республика ва халқаро спорт мусобақалари ҳамда фан олимпиадаларида биринчи ўринни эгаллаган аскарларни тест синовларисиз ўқишга қабул қилиш тартиби белгиланмоқда.

Жорий этилаётган имтиёзлардан яна бири – аскарлар учун ҳарбий хизмат давомида «Битта аскар – битта касб» тамойили асосида 3-6 ойлик ўқув курслари ташкил этилиб, уларга давлат намунасидаги махсус сертификат берилади.

Муддатли ҳарбий хизматдан қайтиб, хусусий секторда фаолият юритмоқчи бўлган ёшларнинг касб-ҳунарга ўқиш харажатлари ваучер асосида Бандликка кўмаклашиш давлат жамғармаси томонидан қоплаб берилади.

Давлат ташкилотларига ишга кириш истагини билдирган ёшларга эса Бошқарув самарадорлиги агентлиги томонидан ўтказиладиган тест синовларида 10 фоизлик имтиёз баллари қўшиб берилади.

Ўзбекистон раҳбари барча таклифларни маъқуллаб, тегишли қарорларни имзолади.