Импичмент хавфи: Трамп Гренландияни эгаллаш режасидан тўхтайдими?
«Reuters» маълумотига кўра, АҚШ маъмурияти Гренландия бўйича куч ишлатиш ғоясидан воз кечди, бунга Конгрессда импичмент бошланиши мумкинлиги ҳақидаги огоҳлантиришлар сабаб бўлган.
АҚШ маъмурияти Гренландияни куч ишлатиш орқали қўлга киритиш масаласини кун тартибидан олиб ташлаган. «Reuters» манбаларга кўра, бунга президент Доналд Трампга нисбатан импичмент хавфи юзага келиши мумкинлиги асосий сабаб бўлган.
Январ ойи бошиданоқ Трамп ва унинг яқин атрофидагилар Гренландия бўйича кескин сценарийларни муҳокама қилган. Айрим вариантларда ҳарбий куч қўллаш эҳтимоли ҳам тилга олинган. Бу эса Конгрессда, жумладан, республикачи ва демократик партия вакиллари орасида жиддий хавотир уйғотган.
Қонун чиқарувчилар президент Конгресс розилигисиз ҳарбий операция бошлаши мумкинлигини Венесуэла билан боғлиқ сценарийга қиёс қилган ҳолда баҳолаган. Бу эътирозлар маъмуриятга очиқ етказилган.
Конгресс сигнали
«Reuters» манбаларининг таъкидлашича, қонун чиқарувчилар ўз хавотирларини давлат котиби Марко Рубио ва Оқ уйнинг бошқа юқори лавозимли амалдорларига билдирган. Республикачилар томонидан берилган асосий сигнал шундан иборат бўлган: агар Гренландияга нисбатан босқин ёки ҳарбий ҳаракат уриниши бўлса, бу импичмент жараёнини бошлаб юбориши мумкин.
Шу тариқа, маъмурият хавфни ҳисобга олган ҳолда, кескин вариантлардан ортга чекинган. Манбаларга кўра, бу қарор сиёсий барқарорликни сақлаш нуқтаи назаридан қабул қилинган.
Геосиёсий фон
Трамп аввал ҳам Гренландияни АҚШ миллий хавфсизлиги учун муҳим ҳудуд сифатида таърифлаб келган. Унинг фикрича, агар Вашингтон фаоллик кўрсатмаса, орол устидан назоратни Россия ёки Хитой қўлга олиши мумкин.
Шу билан бирга, 22 январ куни Трамп НАТО бош котиби Марк Рютте билан музокаралар ўтказган. Томонлар Гренландия бўйича муайян режа юзасидан келишувга эришганини айтган, аммо унинг тафсилотлари ошкор этилмаган.
