Issiqlik tariflari oshishini ma’qullagan deputatlar, «Biz qul emasmiz» fleshmobi va «Sea Breeze Uzbekistan» qurilishidan mamnun Mirzayev — 25 avgust dayjesti

«Biz qul emasmiz». O‘zbekiston ijtimoiy tarmoqlarida yangi fleshmob boshlandi O‘zbekistonda mehnat muhojirlarini qo‘llab-quvvatlash harakati boshlanib ketdi — ijtimoiy tarmoqlarda #bizqulemasmiz (biz qul emasmiz) xeshtegi ostidagi postlar ko‘paymoqda. Bunga sabab, bir yo‘lovchining o‘zbekistonlik taksi haydovchisini «ruslarning quli» deb haqorat qilgani bo‘ldi. Yurtdoshlarini himoya qilishga birinchi bo‘lib Oliy Majlis Qonunchilik palatasining sobiq deputati Rasul Qo‘sherboyev bel bog‘ladi. Aynan u Instagram’da fleshmobni boshladi, shundan so‘ng g‘oya butun mamlakat bo‘ylab foydalanuvchilar orasida tez tarqaldi. Uning Reels’i uch soat ichida 455 ming marta ko‘rildi. So‘m dollarga nisbatan mustahkamlanmoqda: buning asosiy omillari nimalar? So‘m so‘nggi to‘rtta savdo sessiyasi davomida dollarga nisbatan 1,2 foizga mustahkamlandi. Bu tendensiyaga global va mahalliy omillar ta’sir qilmoqda, ammo mutaxassislar fikricha, so‘nggi paytlarda ichki drayverlar hal qiluvchi rol o‘ynamoqda. Xususan, dollar indeksi pasayishi va rublning mustahkamlanishi so‘mga kechikkan ta’sir ko‘rsatmoqda. Markaziy bank ma’lumotlariga ko‘ra, so‘m so‘nggi kunlarda aksariyat valyutaga nisbatan mustahkamlanib, faqat Argentina pesosiga nisbatan qadrsizlangan. Ichki omillar orasida esa oltin eksporti va pul o‘tkazmalari asosiy turtki bo‘lmoqda. Iyul oyida 1,1 mlrd dollarlik oltin eksporti amalga oshirilgani natijasida valyuta taklifi ortdi. Shuningdek, pul o‘tkazmalari ikkinchi chorakda 4,8 mlrd dollarga yetib, o‘tgan yilga nisbatan 21,4 foizga oshgan. Aholi tomonidan valyuta jamg‘armalarini so‘mga almashtirish tendensiyasi ham kursga qisman ta’sir qilmoqda. Shuningdek, iqtisodchilarning ta’kidlashicha, valyuta bozoridagi so‘nggi o‘zgarishlar ko‘proq mahalliy iqtisodiy sharoitlar bilan bog‘liq.   Zoyir Mirzayev: «Sea Breeze — barchani mamnun qiladigan loyiha» Chorvoq suv ombori sohilida amalga oshirilayotgan Sea Breeze Uzbekistan loyihasi jamoatchilikda turli bahs-munozaralarga sabab bo‘ldi. Biroq Toshkent viloyati hokimi Zoyir Mirzayevning ta’kidlashicha, ushbu muhokamalar mutaxassislarning mas’uliyatini yanada oshirgan. «Avvaliga menda ham xavotir bor edi, ammo iflos suvlarni omborga oqizmasdan qayta ishlash va takroran foydalanishga kafolat berilganidan keyin bu tashvishim ancha kamaydi. Hokim sifatida mening asosiy maqsadim — turistlar sonini ko‘paytirish va turizmdan daromadni oshirishdir. Turizm esa tabiat asrab qolingan joylarda rivojlanadi», — dedi Mirzayev.   Deputatlar Toshkentda issiq suv va issiqlik tariflari qimmatlashishini ma’qulladi Xalq deputatlari Toshkent shahar kengashi «Veolia Energy Tashkent» kompaniyasining taklifini ma’qullab, issiq suv va issiqlik ta’minoti xizmatlari uchun tariflarni oshirishga rozilik berdi. Yangi tariflar aholi uchun 15 foizga, yuridik shaxslar uchun 40 foizga va byudjet tashkilotlari uchun 18,8 foizga oshishi ko‘zda tutilgan. Tariflar 1 oktyabrdan kuchga kirishi mumkin va bu qaror shahar hokimi tomonidan imzolanganidan so‘ng 15 kun ichida amalga oshiriladi.  Kompaniya rahbari Sevara Pardayeva ta’kidlashicha, hozirgi paytda aholi real tarifning faqat 18 foizini to‘lamoqda, qolgan qism shahar byudjeti orqali subsidiya qilinyapti. Hukumat 2030 yilgacha subsidiyalarni bosqichma-bosqich tugatishni rejalashtirgan. 2024 yilda subsidiyalar uchun 1,97 trln so‘m ajratilgan bo‘lib, bu 2023 yilga nisbatan ancha ko‘p. Agar tariflar oshirilmasa, kelgusida yanada katta miqdorda ko‘tarilish ehtimoli bor. «Xalq banki» suyunchi puli bo‘yicha tarqalgan xabarlarga raddiya berdi Ijtimoiy tarmoqlarda «Xazna» mobil ilovasida suyunchi pulining eski miqdorda — 811 365 so‘m holatida ko‘rsatilgani tanqidlarga sabab bo‘ldi. Foydalanuvchilar bu holatni ilova yangilanmagani yoki mablag‘ni to‘liq to‘lamaslik bilan bog‘lashdi. Amalda esa 2025 yil 1 avgustdan farzand tug‘ilganda beriladigan nafaqa miqdori 893 513 so‘mga yetkazilgan. Xalq banki bu holat yuzasidan raddiya berdi. Unda suyunchi pulini tayinlash bank vakolatiga kirmasligi, mazkur nafaqa Ijtimoiy himoya milliy agentligi tomonidan tayinlanishi va moliyalashtirilishi, bank esa faqat to‘lovni amalga oshiradi, deyiladi. Shunday qilib, 1 avgustgacha tug‘ilgan bolalar uchun eski summa, undan keyingilar uchun yangi miqdor to‘lanadi. Ilovaning yangilanish holati mablag‘ni to‘lashga ta’sir qilmaydi. Bank fuqarolarni asossiz ma’lumot tarqatmaslikka chaqirdi.