Kamchatkadagi zilzila oqibatida Rossiya yadroviy bazalari shikastlangan

Rossiyaning Kamchatka yarimorolida joylashgan Rybachiy yadroviy suvosti kemalari bazasi o‘tgan haftada ro‘y bergan kuchli zilzila oqibatida jiddiy zarar ko‘rgan. Bu haqda Planet Labs kompaniyasi tomonidan olingan sun’iy yo‘ldosh suratlariga tayanib, The Guardian xabar qildi. Suratlarda bazadagi suzuvchi pirslardan biri jiddiy shikastlangani va uning qismlaridan biri mahkamlangan joyidan ajralib chiqqani ko‘rinib turibdi. Rossiya Mudofaa vazirligi hozircha ushbu xabarga izoh bermagan. 8,8 magnitudali zilzila Kamchatka qirg‘oqlarida yuz berib, butun Tinch okeani bo‘ylab sunami xavfini keltirib chiqardi. Fransuz Polineziyasi, Chili va AQSH sohillarida ham xavf signallari berildi. Zilziladan keyin yarimoroldagi faol vulqonlardan biri ham otildi. Mutaxassislar buni Kamchatkada so‘nggi o‘n yilliklarda qayd etilgan eng kuchli zilzila sifatida baholamoqda. Samarali favqulodda choralar tufayli halokatlar nisbatan kam bo‘ldi. Rossiyada eng katta zarar Severo-Kurilsk portida qayd etildi, sunami to‘lqini port va mahalliy baliq zavodini suv ostiga g‘arq qildi. Inshootlarning bir qismi dengizga oqib ketgan. Rybachiy bazasi Rossiya Tinch okeani floti uchun strategik ahamiyatga ega bo‘lib, bu yerda yadroviy suvosti kemalari saqlanadi, ta’mirlanadi va boshqariladi.