Kanada immigratsiya qonunlarini yanada murakkablashtirmoqda

Immigratsiya vaziri Lena Diab ma’lum qilishicha, «Qattiq chegaralar to‘g‘risida»gi yangi qonun loyihasi migratsiya tizimini mustahkamlash, uyushgan jinoyatchilik, giyohvand moddalar va qurol-yarog‘ olib kirilishini to‘xtatishga qaratilgan. Unga asosan politsiyaga AQSH bilan chegarani nazorat qilish bo‘yicha ko‘proq vakolat beriladi. Qonunga ko‘ra, Kanadada bir yildan ortiq yashagan shaxslar boshpana so‘rash huquqidan mahrum bo‘lishi mumkin. Shuningdek, hukumatga pochtalarni ochib tekshirish, pul o‘tkazmalari va katta summadagi naqd operatsiyalarni cheklash vakolati ham beriladi. Tanqidchilar bu chora-tadbirlar fuqarolik erkinliklariga zid ekanini ta’kidlamoqda. Hujjatda 7300 dollardan ortiq pul operatsiyalari va uchinchi shaxs hisoblariga o‘tkazmalar ham cheklanishi nazarda tutilgan. Sobiq Bosh vazir Jastin Tryudo hukumati iqtisodiy o‘sishni rag‘batlantirish maqsadida vaqtincha ishchilar va talabalarni qabul qilgan edi. Ammo oxirgi paytlarda Kanadada boshpana so‘rovlari keskin ko‘payib, arizalarni ko‘rib chiqish ikki yilgacha cho‘zilmoqda. Aprelda o‘tgan saylovlarda g‘alaba qozongan yangi Bosh vazir Mark Karni migratsiya darajasini barqarorlashtirishni va’da qilgan edi. Yangi qonunga ko‘ra, hukumat jamoat salomatligi yoki milliy xavfsizlikka tahdid bo‘lganda, arizalarni ko‘rib chiqishni vaqtincha to‘xtatishi mumkin.