Кремл атрофидаги элита Путиндан безди ва унинг кетишини хоҳлаяпти — WSJ

The Wall Street Journal таҳлилига кўра, Москвадаги сиёсий муҳит тобора кескинлашмоқда. Кремл атрофидаги айрим таъсирли шахслар Владимир Путиннинг кетишини истамоқда. Нашрнинг ёзишича, энди ҳар қандай заифлик белгиси унинг сиёсий тақдири учун ҳалокатли бўлиши мумкин.

Мюнхен хавфсизлик конференциясининг собиқ раҳбари Волфганг Ишингернинг таъкидлашича, урушни мақсадсиз тугатиш шахсан Путин учун хавфли.

«Урушни бошлаб, минглаб қурбонлар берган инсон учун таслим бўлиш жуда қийин. У қурбон бўлган аскарларнинг оналарига нима дейишини ўйлаб кўриши керак», — деган дипломат.

Европа сиёсий таҳлил маркази раҳбари Алина Полякова ҳам Путин учун урушдан воз кечиш заифлик сифатида қабул қилинишига ишора қилди:

«Кремлда унинг кетишини хоҳловчи кўплаб одамлар бор. Агар у заифлик белгиси кўрсатса, бу унинг ҳукмронлиги учун тугал бўлади», — дейди у WSJ нашрига.

Шу билан бирга, Кремл расмийлари «урушни абадий давом эттириш мумкин» дея даъво қилса-да, иқтисодий вазият тобора оғирлашмоқда. WSJ ёзишича, иқтисодий йўқотишлар ортиб, жамиятда чарчоқ ва беқарорлик кайфияти кучаймоқда. Путиннинг «Украинани ҳар қандай баҳо эвазига йўқ қилиш» ғоясига кўпчилик россияликлар ишонмай қўйган.

Евроосиё Карнеги маркази иқтисодчиси Александра Прокопенконинг таъкидлашича, Россия иқтисоди фақат «эски схемалар» ҳисобига тирик.

«Муаммо пул тугашида эмас, балки анъанавий усулларда урушни молиялаштириш имкони йўқолишида. Барқарорлик иллюзияси йиқилади», — дейди у.

Экспертлар эҳтимолий сценарийлар сифатида пул эмиссияси, инфляция ўсиши, ижтимоий харажатларни қисқартириш ва мажбурий сафарбарликни келтирмоқда. Бу эса ички тангликни янада кучайтиради.

Чикаго университети профессори Константин Сонин Россияни 1918 йилда урушни бой берган Германия билан таққослади. «Ҳозирча таназзул содир бўлгани йўқ, аммо бу каби тизимлар охир-оқибат емирилади», — деди у.