Labubu yaratuvchisi so‘nggi 1,5 oy ichida eng yirik aksiya tanazzuliga uchradi: bozorni nima cho‘chitib yubordi?
Labubu yaratuvchisi Pop Mart aksiyalari olti haftalik yakunlarga ko‘ra rekord darajada quladi. Investorlarning AQSHdagi savdolar bo‘yicha xavotiri bozorda katta noaniqlik keltirib chiqardi.
Xitoyning mashhur Pop Mart International Group kompaniyasi — Labubu va boshqa kollektorlik o‘yinchoqlari yaratuvchisi — 8-dekabr kuni so‘nggi olti haftadagi eng kuchli qulashiga duch keldi. Hongkongdagi savdolar boshida 0,5 foizlik o‘sish kuzatilgan bo‘lsa-da, vaziyat keskin o‘zgardi va aksiyalar 9 foizga pasayib, 199 honkkong dollarigacha tushdi. Bu ko‘rsatkich avgustdagidan 41 foiz past va bozorda jiddiy xavotir uyg‘otdi.
Bloomberg manbalariga ko‘ra, asosiy xavotir — Pop Mart’ning AQSH bozorida «Qora juma» davrida kutilgan darajadagi savdo ko‘rsatkichlariga erisha olmagani haqidagi taxminlar. Morningstar tahlilchisi Jeff Jang bu holat AQSHdagi savdo o‘sishiga nisbatan bozor ishonchini susaytirayotganini ta’kidladi.
Bank Deutsche dekabr oyi boshida yana bir jiddiy omilga e’tibor qaratdi: kompaniya Labubu ishlab chiqarish hajmini 10 mln dan 50 mln donagacha oshirgan bo‘lsa ham, ikkinchi bozordagi ustama avgustdan buyon tushmoqda. Bankning pessimistik ssenariysiga ko‘ra, 2026 yilda kompaniya sotuvlari Xitoyda 20 foizga, xorijda esa 10 foizga qisqarishi mumkin. Shu bois aksiyalarga Hold reytingi va 228 hongkong dollari mo‘ljal bahosi berilgan.
Morgan Stanley esa 2025 yilda Labubu sotuvlari 15,5 mlrd yuanga yetishini kutmoqda — bu ikki yil muqaddamgi ko‘rsatkichdan 41 barobar yuqori. Biroq 2026 yilda o‘sish sur’ati qisman mijozlar ketishi sabab sustlashishi aytilmoqda. Bank noyabr oyida mo‘ljal bahosini 15 foizga tushirib, 325 hongkong dollari deb belgiladi, ammo reytingi «bozordan yuqori» saqlandi.
