Марадонанинг қўли билан гол урган афсонавий тўп яна аукционга қўйилди
Бу тўп 4 йил олдин 2,37 миллион долларга сотилганди. Агар бу сафар ҳам харидор топилса, унинг нархи олдингисига қараганда тўрт баравардан кўпроққа ошган бўлади ва Марадонанинг айнан ўша ўйинда кийган футболкасидан ҳам қимматроқ сотилган футбол ёдгорлигига айланиши мумкин.
© Heritage AuctionsФутбол тарихидаги энг машҳур тўплардан бири яна сотувга чиқарилди. Heritage Auctions аукцион уйи 1986-йилги Жаҳон чемпионатининг чорак финалида Аргентина ва Англия терма жамоалари ўртасидаги ўйинда ишлатилган Adidas Azteca тўпини аукционга қўйди.
Айнан шу тўп билан Диэго Марадона футбол тарихидаги энг машҳур икки голини урган. Биринчи голни у қўли билан урган, аммо ҳакам буни пайқамаган ва голни инобатга олган. Орадан атиги тўрт дақиқа ўтиб, Марадона тўпни майдоннинг ўрталаридан олиб юриб, йўлидаги бир неча инглиз футболчисини алдаб ўтган ва дарвозага гол урган. Бу гол кейинчалик «Аср голи» деб тан олинган.
Орадан қарийб 40 йил ўтди. Шу вақт ичида тўп эскириб, ҳавоси чиқиб кетган ва аввалги шаклини йўқотган. Аммо бу унинг нархига таъсир қилмаган. Аксинча, тарихий аҳамияти туфайли янада қимматлаган.
Аукцион савдолари 31-июль куни 2,5 миллион доллардан бошланади. Ташкилотчилар тўп 10 миллион доллар ёки ундан ҳам қимматроққа сотилишини кутмоқда. Бу тўп 2022-йилда 2,37 миллион долларга сотилган эди. Агар бу сафар ҳам харидор топилса, унинг нархи олдингисига қараганда тўрт баравардан кўпроққа ошган бўлади.
Шунда бу тўп Марадонанинг айнан ўша ўйинда кийган футболкасидан ҳам қимматроқ сотилган футбол ёдгорлигига айланиши мумкин. Марадонанинг ўша футболкаси 2022-йилда 9,3 миллион долларга сотилган эди.
Эслатиб ўтамиз, аввалроқ Sotheby’s аукционида 1969-йил июль ойида «Apollon-11» миссияси билан Ойга парвоз қилган астронавт Базз Олдрин ўзи билан олиб борган СССРнинг митти байроғи 80 минг долларга сотилганди.
