Milliy qaytasug‘urta kompaniyasi tashkil etilishi O‘zbekiston sug‘urta bozorini mustahkamlaydi — Moody’s
02.06.2025 | 15:0011714
Moody’s Ratings xalqaro agentligiga ko‘ra, Uzbekistan Reinsurance Company tashkil etilishi orqali O‘zbekistonda mahalliy qaytasug‘urta salohiyatini jipslashtirish va sug‘urta tizimining moliyaviy barqarorligini oshirish mumkin. Bu chora davlat qo‘lloviga ega bo‘lgan strategik tashabbus sifatida baholanmoqda.
2025 yil 23 may kuni O‘zbekiston prezidenti Shavkat Mirziyoyevning qaroriga asosan, Uzbekistan Reinsurance Company nomli milliy qaytasug‘urta kompaniyasi tashkil etildi. Uning ustav kapitali kamida 300 mlrd so‘mni tashkil etadi (taxminan 23 mln dollar) va u mamlakatning eng yirik sug‘urta ishtirokchilaridan biriga aylanadi.
Moody’s Ratings ta’kidlashicha, ushbu kompaniyaning tashkil etilishi mahalliy qaytasug‘urta ehtiyojlarini birlashtirishga, sug‘urta sektoridagi valyuta chiqib ketishini cheklashga va tashqi bozorlardan bo‘lgan to‘liq qaramlikni kamaytirishga xizmat qiladi. Bundan tashqari, kompaniyaning davlat tomonidan 50 foiz ulushda tashkil etilishi va «El-yurt umidi» agentligining regulyator sifatida ishtirok etishi davlat qo‘llovi mavjudligini ko‘rsatadi.
Moody’s fikricha, yangi kompaniyaning faoliyati mahalliy sug‘urta bozori uchun ijobiy kredit faktori bo‘lib, ayniqsa, kichik sug‘urta kompaniyalari uchun muhim ahamiyatga ega bo‘ladi. Chunki ular xalqaro qaytasug‘urta bozorlariga kirishda qiyinchiliklarga duch kelmoqda. Milliy qaytasug‘urtachi ularga davlat tomonidan qo‘llab-quvvatlanadigan va barqaror manba sifatida xizmat qiladi.
Bundan tashqari, Uzbekistan Reinsurance Company mahalliy bozor ishtirokchilari uchun qaytasug‘urtadagi kontragentlar xavfini kamaytiradi va sug‘urta ekotizimini inklyuziv va barqaror shaklda rivojlantirishga yordam beradi.
Shu bilan birga, Moody’s ta’kidlashicha, xalqaro bozorlar darajasida Uzbekistan Reinsurance Company’ning qaytasug‘urta salohiyati hali katta emas. Shu sabab, yirik tijorat va sanoat risklarini sug‘urta qilishda texnik mutaxassislik va moliyaviy imkoniyatlari keng xalqaro qaytasug‘urtachi kompaniyalar hozircha asosiy rolni saqlab qolishi kutilmoqda.
Agentlikning xulosasiga ko‘ra, milliy va xalqaro kompaniyalar bir vaqtda faoliyat yuritishi bozorda yaxshi raqobat muhitini yaratadi, xavflarni yaxshiroq boshqarish imkonini berib, umumiy barqarorlikni ta’minlaydi.
