Namanganda qalbaki dollar savdosi fosh etildi

Namangan viloyati Kosonsoy tumanida fuqarolardan biri qalbaki 20 ming AQSH dollarini haqiqiy 14 ming dollarga sotishni taklif qilgan paytda ushlangan. U o‘zini ishonchli shaxs sifatida ko‘rsatib, soxta valyutalarni muomalaga kiritishga uringan. Davlat xavfsizlik xizmati va Iqtisodiy jinoyatlarga qarshi kurashish departamentining hamkorlikdagi tezkor tadbirida mazkur shaxs qalbaki 8 ming dollarni sotish jarayonida ashyoviy dalillar bilan qo‘lga olindi. Tergovga qadar tekshiruv natijasida aniqlanishicha, ushbu qalbaki dollarlar 1985 yilda tug‘ilgan Kosonsoylik fuqarodan olingan. U esa soxta 6 ming dollarni 1992 yilda tug‘ilgan boshqa shaxsdan qabul qilgani ma’lum bo‘lgan. Jinoyat ishtirokchilariga nisbatan O‘zbekiston Respublikasi Jinoyat kodeksining 176-moddasi 3-qismi «a» bandi bo‘yicha jinoyat ishi qo‘zg‘atildi. Tergov davomida ular qamoqqa olingan. Hozirda mazkur holat yuzasidan dastlabki tergov harakatlari olib borilmoqda. Hodisa bo‘yicha qo‘shimcha ma’lumotlar tergov yakuniga ko‘ra ma’lum qilinadi.