Navoiy kon metallurgiya kapitali 4,1 mlrd so‘mga qisqardi
«Navoiy kon-metallurgiya kombinati» AJ ustav kapitalini qisqartirdi. Aksiyalar soni kamaydi, emissiya yangilandi.
2026 yil 26-yanvar kuni «Navoiy kon-metallurgiya kombinati» AJ ustav kapitalini kamaytirish bo‘yicha o‘zgarishlar davlat ro‘yxatidan o‘tkazildi. Ro‘yxatdan o‘tkazish «Istiqbolli loyihalar milliy agentligi» tomonidan amalga oshirildi.
Qabul qilingan qarorga muvofiq, jamiyat ustav kapitali 4 mlrd 112 mln 973 ming so‘mga kamaytirildi. Kamaytirish avvalgi emissiyaga tegishli oddiy aksiyalar soni qisqartirilishi orqali amalga oshirildi. Ushbu qaror 2025 yil 30-dekabr kuni Iqtisodiyot va moliya vazirligi orqali qabul qilingan. Qaror aksiyadorlar yig‘ilishida kvorum ta’minlangan holda ma’qullangan va korporativ hujjatlarda rasmiy aks ettirilgan.
Aktivlar davlatga o‘tdi
Ustav kapitali kamayishi jamiyat aktivlarining bir qismini davlat balansiga o‘tkazish bilan bog‘liq. Xususan, «Markaziy ilmiy-tadqiqot laboratoriyasi» hamda «Shimoliy kon boshqarmasi» markaziy fizik-kimyoviy laboratoriyasiga tegishli bino va inshootlar davlatga topshirilgan.
Ushbu mulk obyektlari 2025 yil 22-avgustdagi 34-sonli qabul-topshirish dalolatnomasi asosida o‘tkazilgan. Obyektlar 2025 yil 22-avgust holatiga balans (qoldiq) qiymati bo‘yicha baholangan.
Mulk majmualarining umumiy balans qiymati 4 mlrd 112 mln 972 ming 913,48 so‘mni tashkil etgan. Mazkur summa ustav kapitalidan chegirilgan bo‘lib, qaror buxgalteriya va korporativ hisobda buxgalteriya qayta tasnifi sifatida aks ettirilgan.
Oldingi emissiya
Avvalroq, 2025 yil avgust oyida «Navoiy kon-metallurgiya kombinati» AJ ustav kapitalini 77,7 mlrd so‘mga oshirgan edi. Ikkinchi emissiya doirasida chiqarilgan aksiyalar davlatga o‘tkazilgan ko‘chmas mulk hisobidan joylashtirilgan.
Mazkur mulk Toshkent shahri Yakkasaroy tumanida joylashgan bo‘lib, avval «NKMK jamg‘armasi» balansida turgan. Emissiya qarori 2025 yil 24-iyunda bo‘lib o‘tgan kuzatuv kengashi yig‘ilishida tasdiqlangan.
O‘sha yig‘ilishda, shuningdek, moliya, transformatsiya va xususiylashtirish bo‘yicha birinchi bosh direktor o‘rinbosari almashgan. Bu holat korporativ boshqaruvdagi navbatdagi tuzilmaviy o‘zgarish sifatida baholanmoqda.
G.Bozorova tayyorladi.
