Navoiyda 15,5 mlrd so‘mlik tenderda qonunbuzilishi aniqlandi

Raqobat qo‘mitasining Navoiy viloyati hududiy boshqarmasi tomonidan «Hududiy elektr tarmoqlari» AJ Navoiy hududiy filiali o‘tkazgan eng yaxshi takliflarni tanlash bo‘yicha tender savdolari qonunchilikka muvofiqligi yuzasidan o‘rganildi.

Tekshiruv ishlari «FERGANA AVTOMAT RASCHOT» MCHJning murojaati asosida amalga oshirildi va tanlovning umumiy qiymati 15,5 mlrd so‘mdan ortiq ekani qayd etildi.

Tekshiruvda aniqlangan holatlar

O‘rganish natijalariga ko‘ra, buyurtmachi tomonidan tashkil etilgan tanlov savdolarida «Raqobat to‘g‘risida»gi qonunning 29-moddasi talablariga rioya etilmagan. Xususan, tender shartlariga ishtirokchilar uchun raqobatni cheklaydigan talablar kiritilgani ma’lum bo‘ldi. Shuningdek, tanlov hujjatlarida belgilangan mezonlar asosida takliflar to‘liq va xolis baholanmagani hamda ayrim holatlarda takliflarni noto‘g‘ri baholash amaliyoti qo‘llanilgani aniqlandi.

Bu holatlar tender jarayonida sog‘lom raqobat muhitiga putur yetkazib, ishtirokchilarning teng huquqli ishtirokiga salbiy ta’sir ko‘rsatgan. Qo‘mita mutaxassislari ushbu kamchiliklar tanlov natijalarining shaffofligi va adolatliligini shubha ostiga qo‘yishini ta’kidladi.

Qo‘llanilgan choralar

Aniqlangan qonunbuzilishlar asosida hududiy boshqarmaning maxsus komissiyasi tomonidan buyurtmachi tashkilotga nisbatan ish qo‘zg‘atildi. Ishni ko‘rib chiqish yakunlari bo‘yicha moliyaviy jarima qo‘llash haqida qaror qabul qilindi.

Bundan tashqari, buyurtmachi tashkilotning mansabdor shaxsiga nisbatan ma’muriy bayonnoma rasmiylashtirilib, belgilangan tartibda sud organlariga yuborildi. Qonunbuzilishlarni bartaraf etish hamda kelgusida bunday holatlarning oldini olish maqsadida tashkilotga bajarilishi majburiy bo‘lgan ko‘rsatma berildi.

Eslatib o‘tamiz, avvalroq Raqobat qo‘mitasi hududlarda 4,3 mlrd so‘mdan ortiq davlat xaridlarida qonunbuzarlik holatlarini aniqlab, tegishli choralar ko‘rgani haqida xabar berilgandi.