НКМК олтин сотувидан ярим йилда 2,38 млрд доллар фойда олди

«Навоий конь-металлургия комбинати» АЖ 2026 йилнинг биринчи ярми учун молиявий ҳисоботини эълон қилди. Компания ҳисобот даврида 7 млрд 67 млн доллар соф тушум олган. Бу 2025 йилнинг шу давридаги 4 млрд 713 млн долларга нисбатан 49,9 фоиз кўп.

Компания даромадининг ўсиши асосан жаҳон бозорида олтин нархининг ошиши билан изоҳланган. Бунда ишлаб чиқариш ҳажми аксинча камайган. Жорий йилнинг биринчи ярмида 1,51 млн трой унция олтин ишлаб чиқарилган, ўтган йилнинг шу даврида эса бу кўрсаткич 1,54 млн трой унцияни ташкил этган.

НКМК ҳисоботида қайд этилишича, олтин нархининг ўсиши ишлаб чиқариш ҳажмидаги 1,8 фоизлик пасайишни қоплабгина қолмай, компаниянинг молиявий натижаларини ҳам сезиларли яхшилаган. Натижада соф фойда 2 млрд 382 млн долларга етган ва йиллик ҳисобда 57,2 фоизга ошган.

Таннарх ҳам қимматлашди

Шу билан бирга, компанияда бир унция олтин ишлаб чиқариш таннархи сезиларли даражада ошган. 2026 йил биринчи ярмида ушбу кўрсаткич 1 647 долларни ташкил этган бўлса, 2025 йилнинг мос даврида 1 164 доллар бўлган.

НКМК бу ўсишнинг асосий сабабларидан бири олтин нархининг юқорилиги ортидан роялти, яъни ер қаъридан фойдаланганлик учун солиқ тўловлари кўпайгани эканини билдирган. Ушбу омил таннарх ўсишининг 31 фоизини ташкил этган.

Бундан ташқари, инфляция сарфланадиган материаллар қийматига таъсир кўрсатган. «Мурунтов» конида амалга оширилаётган инвестицион лойиҳа харажатларининг ортиши ҳам ишлаб чиқариш таннархига босим қилган.

Сўмнинг таъсири сезилди

Ҳисоботда ўзбек сўмининг долларга нисбатан мустаҳкамланиши ҳам алоҳида қайд этилган. Олти ой давомида миллий валюта 6,1 фоизга мустаҳкамланган ва бу олтин ишлаб чиқариш таннархини бир унция ҳисобида яна 101 долларга оширган.

Компания ҳисоб-китобига кўра, валюта курсидаги ушбу ўзгариш таннархнинг умумий ўсишининг 8,7 фоизини ташкил қилган. Шунга қарамай, жаҳон бозорида олтин нархининг юқори бўлиши НКМК молиявий натижаларининг ўсишини таъминлаган.

Маълумот учун, «Навоий конь-металлургия комбинати» жаҳонда олтин ишлаб чиқарувчи йирик компаниялар тўртталигига киради. Корхона ер ости бойликлари захираларини геологик қидириш, қазиб олиш ва қайта ишлашдан то тайёр маҳсулот олишгача бўлган ишлаб чиқариш жараёнлари тўлиқ амалга ошириладиган саноат кластеридир.

Компанияда 50 000 дан ортиқ ишчи-ходим ишлайди. Ишлаб чиқариш инфратузилмаси Ўзбекистон ҳудудида жойлашган 12 дан ортиқ йирик конлар ва 10 та қайта ишлаш корхоналаридан иборат. НКМКнинг асосий активлари қаторига ресурс базаси 100 млн. унциядан ортиқ бўлган дунёдаги энг йирик олтин конларидан бири «Мурунтов» кони киради.

Эслатиб ўтамиз, аввалроқ Ўзбекистоннинг олтин захиралари бир йилда 73,1 тоннага ошиб, тарихий рекорд янгилагани ҳақида маълумот берилганди.