Нодирбек Абдусатторов фристайл бўйича Жаҳон чемпионати иштирокчисига айланди
Абдусатторов билан бир қаторда Жавоҳир Синдаров ҳам иштирок этадиган мусобақада 8 нафар кучли шахматчи ғолиблик учун беллашади.
Ўзбекистонлик ёш гроссмейстер Нодирбек Абдусатторов «chess.com» платформасида бўлиб ўтган «Play-In» саралаш турнирида мутлақ ғолибликни қўлга киритиб, «Freestyle Chess» бўйича жаҳон чемпионатининг финал босқичига йўл олди. Бу ҳақда «Дунё» АА хабар бермоқда.
Қайд этилишича, саралаш босқичнинг асосий баҳсида Абдусатторов ҳиндистонлик Пранав Венкатеш билан рўбарў келган ва рақибини 2:0 ҳисобида мағлуб этиб, нуфузли мусобақанинг сўнгги иштирокчисига айланган.
Финал Германияда ўтади
Финал босқичи жорий йилнинг 13–15 февраль кунлари Германиянинг Вайссенхаус шаҳрида бўлиб ўтади. Унда энг кучли саккиз нафар шахматчи бош соврин учун кураш олиб боради. Финалчилар орасида икки нафар ўзбекистонлик гроссмейстер бор.
Икки нафар ўзбекистонлик финалда
Мусобақада Жавоҳир Синдаров ва Нодирбек Абдусатторовдан ташқари, Магнус Карлсен (Норвегия), Фабиано Каруана (АҚШ), Левон Аронян (Арманистон), Аржун Эригайси (Ҳиндистон), Винсент Каймер (Германия) ва Ҳанс Ниманлар (АҚШ) ўзаро куч синашади.
Илк расмий жаҳон чемпионати
Бу турнир Халқаро шахмат федерацияси (FIDE) ва «Freestyle Chess» ҳамкорлигида ўтказилаётган илк расмий жаҳон чемпионати ҳисобланади. Роберт Фишер шахмати (Chess 960) йўналишига асосланган ушбу форматда фигураларнинг бошланғич ҳолати қуръа орқали аниқланиб, бу ўйинчилардан нафақат стандарт назарияни билишни, балки юксак креативлик ва тезкор қарор қабул қилиш қобилиятини талаб этади.
Аввалги муваффақиятлар
Эслатиб ўтамиз, 2024 йил февраль ойида Германияда ўтган «Freestyle Chess G.O.A.T. Challenge» турнири мусобақаларида Нодирбек Абдусатторов феноменал ўйин кўрсатиб, гуруҳ босқичида амалдаги ва собиқ жаҳон чемпионлари Магнус Карлсен ҳамда Дин Лижэнни мағлуб этган ва жадвалда якка пешқадам бўлган.
Жавоҳир эса «Freestyle Chess»да энг хавфли рақиблардан бири эканини исботлаган. У Ян Непомняший ва Левон Аронян каби шахмат юлдузларига қарши муросасиз ўйин намойиш этиб, кутилмаган вазиятларда тезкор ва ностандарт қарор қабул қилиш қобилияти билан мутахассислар эътиборини тортган.
