«Nvidia» 2026 йилда 4 трлн долларлик бозор нархини сақлаб қололадими?

2026 йил бошида дунёнинг энг қиммат компанияси ҳисобланган «Nvidia» бозорда босим остида қолди. 2025 йил 29 октябрда қайд этилган чўққидан кейин акциялар 9,1 фоизга пасайди. Натижада, компаниянинг бозор қиймати қисқа вақт ичида 460 млрд долларга қисқарди. Бу рақам уч йил аввалги «Nvidia» умумий капитализациясидан ҳам юқори.

Аввалроқ «Nvidia» сунъий интеллект учун мўлжалланган чиплар бозорининг 90 фоизидан ортиғини назорат қилар эди. Бироқ 2026 йилга келиб вазият ўзгармоқда. «Alphabet», «Amazon», «Meta» ва «Microsoft» каби йирик мижозлар қиммат GPU’ларга қарамликни камайтириш мақсадида ўз чипларини ишлаб чиқаришни жадаллаштирди. Бу эса «Nvidia»нинг анъанавий устунлигига босим қилмоқда.

Рақобат яна бир йўналишда ҳам кучаймоқда. Махсус ASIC-чиплар сегментида «Broadcom» етакчилар қаторига чиқиб, капитализациясини 1,6 трлн долларга етказди ва «Tesla»ни ортда қолдирди. Шу билан бирга, «Advanced Micro Devices» ҳам «OpenAI» ва «Oracle»дан йирик буюртмалар олди. Таҳлилчиларга кўра, AMD’нинг дата-марказлар сегментидаги даромади 2026 йилда 60 фоизга ўсиб, 26 млрд долларга етади.

«Nvidia» эса жавоб чораларини кўрмоқда. CES кўргазмасида компания раҳбари Женсен Ҳуанг сунъий интеллект моделлари мураккаблиги ҳар йили ўн баравар ўсиб бораётганини айтди. Компания янги «Rubin» чиплар авлодини тайёрламоқда ҳамда декабр ойида «Groq» стартапининг етакчи муҳандисларини ишга олди.

Шу билан бирга, молиявий кўрсаткичлар «Nvidia» учун ижобий қолмоқда. 2027 молиявий йилда компания фойдаси 57 фоизга, савдоси эса 53 фоизга ўсиши кутилмоқда. P/E коэффициенти 25 даражасида бўлиб, бу «Nvidia» акцияларини кўплаб рақобатчиларга нисбатан арзонроқ қилади. Асосий хавфлар эса маржанинг вақтинчалик пасайиши, Хитой бозорига боғлиқлик ва компаниянинг S&P 500 индексидаги улкан улуши билан боғлиқ.

2025 йилнинг июн ойида «Nvidia» «Microsoft»ни ортда қолдириб, дунёдаги энг қиммат компанияга айлангани ҳақида хабар берган эдик.