Олтин 6000 долларгача? Таҳлилчилар қимматбаҳо металлнинг келажаги борасида баҳслашяпти

2026 йил бошидан бери олтин нархлари динамикаси ўта юқори волатилликни (ўзгарувчанлик) намоён этмоқда. 26 январ куни 5000 доллар психологик чегарасини тарихий равишда ёриб ўтиб, ўтган ой охирида 5600 доллардан юқори чўққига чиққанидан сўнг, қимматбаҳо металл котировкалари коррекция босқичига ўтди. Шунга қарамай, қисқа муддатли кескин пасайиш фаол тикланиш босқичи билан алмашди, деб ёзади «MarketWatch».

Айрим таҳлилчилар 2026 йил охиригача олтин нархи унцияси учун 6000 долларгача ўсишини кутмоқда. Бу эса жорий кўрсаткичларга нисбатан 22 фоизлик ўсишни англатади.

«18 феврал кунги савдоларда қимматбаҳо металл нархи бир пайтнинг ўзида 1 фоиздан ортиқка сакраб, аввалги сессиядаги ҳафталик минимумдан тикланди», деб қайд этади «Reuters».

Нашр вақтига келиб, спот олтин нархи 1,5 фоизга ошиб, унцияси 4953 долларга етди. Котировкалардаги беқарорлик фонида «MarketWatch» беш нафар аналитикнинг олтин келажаги бўйича прогнозларини эълон қилди.

2026 йил охиригача олтинни нима кутмоқда?

«Midas Funds» портфел менежери Томас Уинмилл фикрича, 2026 йил охирига бориб олтин нархи унцияси учун 6000 долларгача (+22%) кўтарилиши мумкин. У ўсиш драйверлари сифатида жаҳон марказий банкларининг тизимли равишда металл харид қилиши ва АҚШ президенти маъмурияти сиёсатини кўрсатади, бу эса, унинг фикрича, охир-оқибат доллар қадрсизланишига олиб келади. Уинмилл бу омиллар янги психологик чегарани ишонч билан енгиб ўтишга имкон беради, деб ҳисоблайди.

«Global X» вице-президенти Тревор Йейтс ҳам олтин нархининг ўсиши давом этишини кутмоқда. Унинг фикрича, инвесторлар томонидан маблағлар чекланган даражада тақсимланаётгани ва глобал суверен қарз истиқболларининг ёмонлашуви шароитида олтин бозори узоқ муддатли «буқалар» циклининг дастлабки босқичида турибди. Йейтс бозор иштирокчиларига олтин қазиб олувчи компаниялар акцияларига эътибор қаратишни тавсия қилади: улар тарихий маълумотларга нисбатан паст баҳоланган ва ҳатто металл нархи барқарорлашганда ҳам устун ўсиш кўрсатиши мумкин.

«Alternative Options» компаниясининг тадқиқот ва технологиялар бўйича директори Жастин Кардуэлл ҳам эҳтиёткор оптимизм билдирмоқда.

«2026 йилнинг қолган қисмида олтин нархлари беқарор бўлиб, ҳар икки томонга кескин тебранишлар кузатилишини кутяпман», – дейди у.

Бироқ у вақт ўтиши билан олтин нархи барқарорлашиб, секин-аста ўсишни бошлаши мумкинлигини истисно қилмайди. Буни Кардуэлл спекулянтлардан йирик институционал инвесторларга қизиқиш ўтиши билан изоҳлайди.

«Concurrent Wealth Management» асосчиси ва молиявий маслаҳатчиси Престон Д. Черрининг фикрича, «олтин нархларидаги сўнгги тебранишлар ички ва глобал даражадаги институционал ноаниқлик билан боғлиқ». Унинг айтишича, сиёсатга ишонч сусайган ва макроиқтисодий вазият беқарор кўринган «маълум ноаниқлик» даврларида олтин одатда ютуққа эга бўлади. Агар 2026 йилда ҳам шу омиллар таъсир қилса, металл нархларида волатиллик юқори бўлиши мумкин. Черри ўсиш давом этиши эҳтимолини тан олса-да, унинг «шифти» 2025 йил рекордларидан анча паст бўлишини таъкидлайди. У АҚШда йил ўрталарида ўтадиган сайловлар арафасида «паноҳ активлар»га маблағ оқими сусайиши мумкинлигидан ҳам огоҳлантиради.

«Олтин долзарб актив бўлиб қолмоқда, аммо инвесторлар ўтган йилги сўлғинсиз ўсиш эмас, балки волатил динамикани кутгани маъқул», – дейди у.

«Flynn Zito Capital Management» компаниясининг сертификатланган молиявий режалаштириш мутахассиси Райан Хайсс эса, «ўтган йил давомида кузатилган кучли ўсишдан кейин олтин нархларидаги тебранишлар одатий ҳол», деб ҳисоблайди. Унинг эслатишича, металл дивиденд ёки пул оқими яратмайди, шунинг учун унинг нархи кўп жиҳатдан инвесторлар кайфияти, фоиз ставкалари, инфляцион кутилмалар ва умумий бозор ноаниқлигига боғлиқ.

Маълумот учун, 2025 йил якунларига кўра, олтин 65 фоизга қимматлашди – бу 1979 йилдан бери энг катта ўсиш бўлди. 2026 йил бошидан буён спот олтин қарийб 14 фоизга ўсди. Жорий йил январ ойида максимумда металл унцияси 5600 доллардан юқори савдоланган бўлса, минимумда тахминан 4300 доллар атрофида бўлган.