Олтин нархи яна 5 минг долларга қайтди: харидорлар бозорга қайта ораламоқда
Тарихий қулаши ортидан олтин нархи иккинчи кун кетма-кет ўсиб, инвесторлар қимматбаҳо металлни арзонроқ чоғида харид қилишга ўтди.
«Bloomberg» маълумотларига кўра, олтин нархи икки кун ичида кескин ўсиб, яна троя унцияси учун 5 минг долларлик психологик чегарадан ошди. 4 феврал куни қуйма олтин қиймати 2,9 фоизга кўтарилди, ундан олдинги сессияда эса ўсиш 6 фоиздан ошиб кетган эди.
Шу билан бирга, олтин ҳали ҳам 29 январда қайд этилган тарихий максимумдан тахминан 500 доллар пастроқ савдолашилмоқда. Бироқ йил бошидан буён актив 17 фоизга яқин ўсишни кўрсатиб, инвесторлар қизиқиши сақланиб қолаётганини намоён этмоқда.
Қулаш сабаблари
Таҳлилчилар фикрича, бозордаги мажбурий сотувлар босқичи якунланди. Олтиндаги кескин қулаши ортиқча спекулятив қизиқиш оқибатида юзага келган. Нарх тез пасайиши инвесторларнинг стоп-лосс ордерларини ишга тушириб, дилерларни рискларни ҳэж қилиш учун активларни оммавий сотишга мажбур қилди.
Бунга қўшимча равишда, Хитойдаги йирик олтин ETF фондларидан бир кун ичида 1 млрд доллар капитал чиқиб кетди. Бу чакана инвесторлар ишончи вақтинча сусайганини кўрсатди. «TD Securities» стратеги Даниэл Галига кўра, юқори волатиллик қисқа муддатда хусусий инвесторларни бозордан четлатиб, майдонни профессионал ўйинчиларга қолдириши мумкин.
Узоқ муддатли кутилмалар
Қисқа муддатли қийинчиликларга қарамай, олтиннинг фундаментал омиллари кучли қолмоқда. «Deutsche Bank» олтин нархи 6 минг долларгача кўтарилишини кутмоқда. «Goldman Sachs» эса йил охиригача 5400 долларлик мўлжал юқори томонга қайта кўриб чиқилиши мумкинлигини таъкидламоқда.
«Bank of America» таҳлилчилари олтин узоқ муддатли инвестиция сифатида кумушга нисбатан барқарорроқ эканини қайд этмоқда. Шу билан бирга, АҚШ ва Эрон ўртасидаги геосиёсий кескинлик ҳам инвесторларни «тинч гўша» активларига йўналтириб, олтин нархини қўллаб-қувватламоқда.
