OpenAI компанияси 1 трлн доллар қийматда IPO қилишни режалаштиряпти
OpenAI компанияси ўз таркибий тузилмасини ўзгартириб, акцияларини оммавий савдога чиқариш ҳақида режалар тузмоқда. Агар бу амалга ошадиган бўлса, бу тарихдаги энг йирик IPO бўлиши кутиляпти.
Reutersʼнинг айрим манбалари хабарига кўра, OpenAI 2026 йилнинг иккинчи ярмидаёқ қимматли қоғозлар назорат қилувчи органларга ариза топширишни режалаштирмоқда.
Дастлабки музокараларда компания камида 60 миллиард доллар, эҳтимол ундан ҳам кўпроқ маблағ жалб қилишни кўриб чиққан. Бироқ, манбаларнинг таъкидлашича, музокаралар ҳали бошланғич босқичда бўлиб, режалар, жумладан, рақамлар ва муддатлар бизнеснинг ўсиши ҳамда бозор шароитларига қараб ўзгариши мумкин.
OpenAI бош молия директори Сара Фриар баъзи ҳамкорларга компания 2027 йилда биржада листингга чиқмоқчилигини айтган. Аммо баъзи манбалар бу янада эртароқ, тахминан 2026-йил охирида содир бўлиши мумкинлигини тахмин қилишмоқда.
IPO тайёргарлиги ChatGPT муаллифлари учун дунё бўйлаб кенгайиш режасининг янги босқичи эканлигини кўрсатмоқда, чунки Microsoftʼга боғлиқликни камайтирадиган компания шаклини қайта ташкил этиш жараёни якунланган ва ивестициялар жалб қилиш учун янги имкониятлар очилган. IPOнинг ўтказилиши капитални янада самаралироқ жалб қилиш имконини беради ва давлат акцияларидан фойдаланиб, йирикроқ харидларни амалга оширишга йўл очади. Бу эса бош директор Сэм Алтманнинг сунъий интеллект инфратузилмасига триллионлаб доллар сарфлаш режаларини молиялаштиришга ёрдам беради.
Йил охирига келиб йиллик даромад кўрсаткичининг тахминан 20 миллиард долларга етиши кутилаётган бир пайтда, 500 миллиард долларлик компания ичида зарарлар ҳам ортиб бормоқда.
Сешанба кунги жонли эфирда Алтман компанияни оммавий акциядорлик жамиятига айлантириш имконияти ҳақида фикр билдирди.
«Бизнинг капитал эҳтиёжларимизни ҳисобга олган ҳолда, бу биз учун энг эҳтимолий йўл, деб айтиш ўринли бўлади», дея таъкидлади у.
OpenAI 2015 йилда нотижорий жамғарма шаклида фаолиятини бошлаган эди. Дастлабки йилларда Илон Маск ҳам компания асосчиларидан бири бўлган, бироқ Сэм Алтман билан келишмовчилик сабабли жамғармадан чиқиб кетган. Ҳозирги даврга келиб Илон Маск OpenAI асосчиларини жамғармани нотижорат илмий муассаса сифатида ривожлантириш ўрнига тижорий йўналишда фаолият кўрсатадиган ёпиқ ташкилотга айлантирилгани сабабли судга берган.
