O‘zbekiston fuqarolari qaysi davlatlarga vizasiz safar qilsa bo‘ladi?
14.07.2025 | 15:3049033
Turizm yoki xizmat safari rejalashtirayotganlar uchun eng muhim ma’lumotlardan biri — vizasiz va yengillashtirilgan tartibda kirish mumkin bo‘lgan mamlakatlar ro‘yxati hisoblanadi. O‘zbekiston fuqarolari 25 dan ortiq mamlakatga vizasiz, yana ko‘plab davlatlarga esa elektron yoki borishda viza olish orqali safar qilishlari mumkin.
O‘zbekiston fuqarolari 2025 yil iyul holatiga ko‘ra qator mamlakatlarga vizasiz tartibda safar qilish imkoniyatiga ega. Bu mamlakatlar qatoriga Armaniston, Antigua va Barbuda, Ozarboyjon, Barbados, Belarus, Gurjiston, Gaiti, Eron, Qozog‘iston, Qatar, Xitoy, Qirg‘iziston, Malayziya, Mikroneziya, Moldova, Mug‘uliston, Filippin, Rossiya, Tojikiston, Tailand, Turkiya, Ukraina va BAA kiradi.
Shu bilan birga, yana 40 ga yaqin davlatlarga O‘zbekiston fuqarolari viza olishni yengillashtirilgan usulda — chegarada (visa on arrival) yoki elektron tartibda (e-visa) amalga oshirishlari mumkin. Ular orasida Boliviya, Kambodja, Indoneziya, Keniya, Livan, Maldiv orollari, Saudiya Arabistoni, Turkmaniston, Shri-Lanka, Gambiya va boshqalar bor.
Har bir mamlakat o‘z qoidalariga ega: viza muddati 14 kundan 90 kungacha bo‘lishi mumkin, ayrim davlatlar mehmonxona bron qilinishini, qayta uchish chiptasi yoki sug‘urta polisi talab qilishlari mumkin. Pasport muddati ham safar paytida kamida 6 oy amalda bo‘lishi shart.
Mamlakatlarga borishdan avval, tegishli davlat elchixonalari yoki Tashqi ishlar vazirligining rasmiy sayti orqali kirish qoidalarini aniqlash tavsiya etiladi.
