O‘zbekiston ilk ipoteka obligatsiyalarini chiqardi
O‘zbekistonda ipoteka bozorini rivojlantirish doirasida 40,5 mlrd so‘mlik birlamchi ipoteka obligatsiyalari emissiyasi davlat ro‘yxatidan o‘tkazildi.
© istockO‘zbekiston Respublikasi Istiqbolli loyihalar milliy agentligi 40,5 mlrd so‘m miqdoridagi birlamchi ipoteka obligatsiyalari emissiyasini davlat ro‘yxatidan o‘tkazdi. Bu haqda Istiqbolli loyihalar milliy agentligi xabar berdi.
Mazkur emissiya Prezidentning 2025 yil 21-fevralda qabul qilingan «Uy-joy va ipoteka bozorini yanada rivojlantirishga oid qo‘shimcha chora-tadbirlar to‘g‘risida»gi farmoni ijrosi doirasida amalga oshirildi.
Chiqarilish ipoteka obligatsiyalarini emissiya qilish va muomalaga chiqarish bo‘yicha «Tartibga solish qumdoni» maxsus huquqiy rejimi doirasida tasdiqlangan vaqtinchalik nizom talablariga muvofiq tashkil etildi.
Emitent sifatida ipoteka agenti vazifasini bajaruvchi «UMRC SPV» MCHJ ishtirok etmoqda. Obligatsiyalar ipoteka qoplamasi hamda «O‘zbekiston ipotekani qayta moliyalashtirish kompaniyasi» AJ kafilligi bilan ta’minlangan. Bir dona obligatsiyaning nominal qiymati 100 so‘m etib belgilangan.
Ipoteka bozori uchun yangi bosqich
Emissiya doirasida jalb qilinadigan mablag‘lar ipoteka kreditlarini moliyalashtirish va qayta moliyalashtirishga yo‘naltiriladi. Bu banklar va ipoteka tashkilotlari uchun qo‘shimcha moliyaviy resurslar jalb qilish imkonini yaratadi.
Mutaxassislar fikricha, ipoteka obligatsiyalari ipoteka aktivlarini likvid moliyaviy instrumentlarga aylantirish imkonini beradi. Bu esa uzoq muddatli investitsiyalarni jalb qilish va moliya bozori ishtirokchilari uchun yangi imkoniyatlar yaratishga xizmat qiladi.
Kapital bozori rivojlanadi
Istiqbolli loyihalar milliy agentligiga ko‘ra, ipoteka obligatsiyalari bozorining shakllanishi mamlakat kapital bozorini chuqurlashtirish va moliyaviy instrumentlar turini kengaytirishga yordam beradi.
Shuningdek, mazkur mexanizm iqtisodiyotda moliyaviy resurslarni samarali qayta taqsimlash, uy-joy qurilishi sohasini qo‘llab-quvvatlash va uzoq muddatli investitsiyalarni jalb qilish uchun muhim ahamiyat kasb etadi. Pilot chiqarilish esa kelgusida ushbu bozorni kengaytirish uchun asos bo‘lishi kutilmoqda.
