Ўзбекистон президенти дунёнинг энг нуфузли мусулмонлари рейтингига киритилди

Ўзбекистон Республикаси Президенти Шавкат Мирзиёев Иордания пойтахти Амман шаҳрида жойлашган Қироллик исломий стратегик тадқиқотлар маркази томонидан эълон қилинадиган анъанавий «The Muslim 500» (Дунёнинг энг нуфузли 500 мусулмони) рейтингига киритилди. Ўзбекистон раҳбари мазкур нуфузли рўйхатда 40-ўринда қайд этилган.

Рейтинг тузувчилари Президент раҳбарлигида амалга оширилаётган «Янги Ўзбекистон» ислоҳотлар дастурини алоҳида эътироф этган. Хусусан, иқтисодиётнинг либераллаштирилгани, хорижий инвесторлар учун яратилган қулай шароитлар ҳамда халқаро савдонинг кенгайтирилгани ижобий баҳоланган. Пахтачилик соҳасида мажбурий меҳнатга бутунлай барҳам берилгани эса мамлакатнинг энг муҳим ютуқларидан бири сифатида таъкидланган.

Шунингдек, «The Muslim 500» муаллифлари Ўзбекистоннинг минтақадаги қўшнилар билан муносабатлари яхшилангани ва янада очиқ ташқи сиёсат юритилаётгани республиканинг халқаро дипломатик ва иқтисодий ҳамкор сифатидаги нуфузини ошираётганини қайд этган.

Тарихий исломий меросга қаратилаётган улкан эътибор ҳам муҳим омил бўлди. Расмий идоралар кўмагида масжидларнинг қурилиши ва таъмирланиши, ҳаж ҳамда умра зиёратлари учун имкониятларнинг кенгайтирилиши, қадамжоларнинг тикланиши ва диний-маърифий таълимнинг ривожлантирилиши рейтинг муаллифларининг диққат марказида бўлган. Тошкентда Ислом цивилизацияси марказининг ташкил этилиши бу борадаги муҳим қадамлардан бири сифатида кўрсатиб ўтилган.

2027 йилги нашрда тарихда биринчи марта рейтингнинг биринчи поғонасини биратўла беш киши бўлишиб турибди. Булар:

— Саудия Арабистони қироли Салмон бин Абдулазиз Ол Сауд
— Саудия Арабистони валиаҳд шаҳзодаси Муҳаммад бин Салмон
— Покистон Бош вазири Шаҳбоз Шариф
— Покистон мудофаа кучлари қўмондони, фелдмаршал Осим Мунир
— Туркия Президенти Ражаб Тоййиб Эрдўған

«The Muslim 500» рўйхатида Марказий Осиё республикаларидан Қозоғистон Президенти Қосим-Жомарт Тўқаев ва хонанда Димаш Қудайберген, шунингдек, Тожикистон муфтийси Саидмукаррам Абдулқодирзода ҳам жой олган. Рўйхатда Қирғизистон ва Туркманистон вакиллари қайд этилмаган.

«The Muslim 500» рўйхатида Марказий Осиё республикаларидан Қозоғистон Президенти Қосим-Жўмарт Тўқаев ва хонанда Димаш Қудайберген, шунингдек, Тожикистон муфтийси Саидмукаррам Абдулқодирзода ҳам жой олган. Рўйхатда Қирғизистон ва Туркманистон вакиллари қайд этилмаган.

«The Muslim 500» рейтинги 2009 йилдан бери эълон қилиб келинади. Унинг бош мезони — шахснинг мусулмон оламига ёки ушбу дин вакилларига кўрсатаётган таъсир қобилиятидир. Иордания Қироллик ислом марказининг таъкидлашича, бу дунёдаги энг машҳур ва кўп иқтибос келтириладиган йиллик маълумотнома ҳисобланади, бироқ у қатъий илмий ёки расмий мақомга эмас, балки экспертлик ва публицистик хусусиятга эга.