O‘zbekiston Xitoyga gaz sotishdan qancha ishlab topgani ma’lum bo‘ldi
Respublika gaz eksporti hajmi bo‘yicha mintaqada Turkmaniston va Qozog‘istondan keyingi o‘rinni egallab turibdi.
2025 yil yakunlariga ko‘ra, O‘zbekiston Xitoyga tabiiy gaz yetkazib beruvchi asosiy davlatlar beshligidan joy oldi va ushbu resurs eksportidan 773 million dollar miqdorida moliyaviy tushum qayd etdi. Bu haqda Xitoy Xalq Respublikasi bojxona statistikasiga tayanib TASS xabar berdi.
Ma’lumotlarga ko‘ra, O‘zbekiston 2025 yilda Xitoyga «moviy yoqilg‘i» yetkazib berish orqali 773 million dollar ishlab topgan. Nashr e’lon qilgan ushbu ko‘rsatkichlar respublikaning Xitoy iqtisodiyoti uchun quvur orqali gaz yetkazib beradigan asosiy hamkorlar qatoridagi mavqeini yana bir bor tasdiqladi.
Xitoyga gaz yetkazib berishda kim yetakchi?
Xitoy bozorida energiya resurslarini yetkazib berish bo‘yicha Rossiya Federatsiyasi mutlaq yetakchilikni saqlab qolgan bo‘lib, uning eksporti 9,41 milliard dollarni tashkil etgan. Ro‘yxatda ikkinchi o‘rinda borayotgan Turkmaniston esa gaz sotishdan 8,41 milliard dollar daromad olgan.
Myanma 1,53 milliard dollarlik ko‘rsatkich bilan uchinchi pog‘onani egallagan bo‘lsa, qo‘shni Qozog‘iston 1,13 milliard dollarlik yoqilg‘i sotish bilan to‘rtinchi o‘rinni band etdi. O‘zbekiston esa kuchli beshlikni yakunlab berdi.
Xitoy bozoridagi talabning o‘sish dinamikasi
2024 yilda Xitoyning xorijdan sotib olgan quvur gazining umumiy hajmi avvalgi yilga nisbatan 8,6 foizga oshgan. 2025 yildagi raqamlar Xitoy sanoatining uglevodorodlarga bo‘lgan ehtiyoji naqadar yuqori ekanini ko‘rsatdi.
