O‘zbekistonda xizmatlar sohasi iqtisodiy o‘sishning asosiy dvigateliga aylanmoqda

O‘zbekiston Respublikasi Vazirlar Mahkamasi huzuridagi Makroiqtisodiy va hududiy tadqiqotlar instituti ma’lumotlariga ko‘ra, so‘nggi yetti yil ichida mamlakatda xizmatlar sohasi barqaror o‘sishga erishdi. 2024 yilda soha mamlakat yalpi ichki mahsulotining 47,4 foizini tashkil etdi. Bandlikdagi ulushi esa 55,4 foizga yetdi, bu 7,9 million aholi faoliyati bilan bog‘liq. Jahon bankining baholashiga ko‘ra, 2017–2023 yillarda O‘zbekistonda xizmatlar sohasining o‘sish sur’ati yillik 6,5 foizni tashkil qilib, Markaziy Osiyoda eng yuqori ko‘rsatkich qayd etildi. Moliya, axborot, aloqa va ta’lim xizmatlaridagi o‘sish ayniqsa katta bo‘ldi. 2023 yilda O‘zbekiston elektron tijorat bozor hajmini 1 mlrd AQSH dollaridan oshirdi. Shuningdek, mamlakat raqamli iqtisodiyotning ulushini 3,7 foizgacha oshirishga muvaffaq bo‘ldi. Bu ko‘rsatkich 2017 yilda 2,2 foiz edi. Xizmatlar sohasi bo‘yicha xalqaro reytinglarda ham O‘zbekiston natijalari yaxshilandi. Xususan, Kearney xalqaro indeksda O‘zbekiston 40-o‘rinni, raqamli boshqaruv bo‘yicha esa 43-o‘rinni egalladi. Elektron ishtirok indeksida mamlakat 53-o‘ringa ko‘tarildi. Turizm sektorida ham yuqori o‘sish kuzatildi. 2024 yilda mamlakat 8 million sayyohni qabul qildi va turizm xizmatlarining iqtisodiyotdagi ulushi 22,4 foizga yetdi. O‘zbekiston Turizm rivojlanish indeksida 16 pog‘onaga yuqorilab, 78-o‘rinni egalladi. Logistika sohasida erishilgan natijalar ham ahamiyatli. MDH mamlakatlari orasida O‘zbekiston 5-o‘ringa, Markaziy Osiyoda esa 2-o‘ringa chiqdi. Bu, asosan, bojxona tizimi va xalqaro savdo logistikasining yaxshilanishi hisobiga sodir bo‘ldi. 2024 yil yakunida xizmatlar eksporti 7,2 milliard AQSH dollariga yetdi. Bu ko‘rsatkich 2017 yilga nisbatan 6 barobar ko‘p bo‘lib, umumiy eksport hajmining 26,7 foizini tashkil qildi. Eksportning asosiy qismini turizm va transport xizmatlari egalladi.