Ўзбекистоннинг олтин захиралари бир йилда 73,1 тоннага ошиб, тарихий рекорд янгилади

2026-йил 1-сентябр ҳолатига Ўзбекистоннинг соф олтин захиралари 14,1 миллион унция ёки 438,8 тоннани ташкил қилди. Бу бир йил аввалги 365,8 тоннадан 73,1 тоннага ёки 20 фоизга кўп.

2025-йил октябрида захира 361,4 тоннагача тушган бўлса, шундан кейин асосан ўсиш кузатилган. 2026 йил бошида 390,3 тонна бўлган захира сентябрга келиб 48,5 тоннага ошиб, 438,8 тоннага етди.

Йил бошидан бери қайд этилган 48,5 тонналик ўсишнинг асосий қисми — 40 тоннасини Ўзбекистон Марказий банки фақатгина дастлабки етти ой ичида харид қилган. Ушбу фаоллик натижасида Ўзбекистон олтин сотиб олувчи марказий банклар ўртасида жаҳонда Полша ва Хитойдан сўнг кучли учликка кирган.

Айни пайтда, Ўзбекистонда олтин асосан «Навоий кон-металлургия комбинати» ва «Олмалиқ конь-металлургия комбинати» томонидан қазиб олинади. Марказий банк эса мамлакатда қазиб олинган олтинни харид қилиш бўйича ягона харидор ва эксклюзив ҳуқуқ эгаси ҳисобланади.

Олтиннинг қиймати ҳам ошган

1-сентябр ҳолатига кўра, Ўзбекистоннинг олтин захиралари қиймати бир ойнинг ўзида қарийб 16 фоизга ошиб, 64,9 миллиард долларга баҳоланган. Бу кўрсаткичнинг ўсишида нафақат захира ҳажмининг кўпайиши, балки жаҳон бозорида олтин нархининг ошиши ҳам муҳим рол ўйнаган.

Август ойи бошида бир трой унция олтиннинг нархи қарийб 4 минг доллар атрофида бўлган. 5-август куни эса котировкалар энг юқори нуқтасига чиқиб, бир унция учун 4,7 минг долларга яқинлашган.

Ой охирига келиб олтин бозорида бироз пасайиш кузатилиб, нарх 4 450 доллар атрофида шаклланган.