Pashinyan Yevropa Ittifoqi yoki Yevroosiyo o‘rtasida tanlov qilish shartini aytdi
Armaniston bosh vaziri Rossiya, Belarus, Qozog‘iston, Qirg‘iziston tomonidan qo‘yilgan talabga javob berdi.
Armaniston bosh vaziri Nikol Pashinyan mamlakatning Yevropa Ittifoqi va Yevroosiyo iqtisodiy ittifoqi o‘rtasida tanlov qilishi haqidagi masalaga munosabat bildirdi.
Uning ta’kidlashicha, bu bo‘yicha umumxalq referendumi faqat Armaniston Yevropa Ittifoqiga a’zo bo‘lish uchun rasmiy ariza topshirganidan keyin o‘tkazilishi mumkin.
Pashinyanning so‘zlariga ko‘ra, hozircha yevrointegratsiya jarayonining rasmiy bosqichlari boshlanmagani uchun referendum haqida gapirish erta hisoblanadi.
Shu bilan birga, bosh vazir Armaniston hozircha Yevroosiyo iqtisodiy ittifoqidagi faoliyatini davom ettirayotganini va keskin qarorlar qabul qilishga shoshilmasligini bildirdi.
YOII davlatlari bosim qilmoqda
Avvalroq Rossiya, Belarus, Qozog‘iston va Qirg‘iziston Armanistonni Yevropa Ittifoqi va YOII o‘rtasida aniq tanlov qilishga chaqirgan edi.
Ostona shahrida bo‘lib o‘tgan Oliy Yevroosiyo iqtisodiy kengashi sammiti yakunlari bo‘yicha qabul qilingan qo‘shma bayonotda Yerevanda ushbu masala bo‘yicha imkon qadar tezroq umummilliy referendum o‘tkazish maqsadga muvofiqligi qayd etilgan.
YOII davlatlari Armanistonning Yevropa Ittifoqiga yaqinlashuvi tashkilot mamlakatlarining iqtisodiy xavfsizligiga ta’sir ko‘rsatishi mumkinligini aytmoqda.
