Pentagondan senzura: jurnalistlar axborotni oldindan tasdiqlatib olishi shart qilinmoqda
AQSH Mudofaa vazirligi jurnalistlar uchun yangi cheklovlar joriy qildi. Endi Pentagonga kirish huquqini olish uchun ular 17 sahifalik hujjatni imzolashlari va har qanday ma’lumotni, hatto maxfiy bo‘lmaganini ham, oldindan vazirlik bilan kelishishlari shart.
The Washington Post va Politico nashrlarining bu borada yozishicha, bu qaror 19 sentyabr kuni ommaviy axborot vositalariga yetkazilgan. Politico ta’kidlaganidek, bu AQSHning eng yirik federal idorasi faoliyatini yoritadigan jurnalistlar uchun hozirgacha bo‘lgan eng jiddiy cheklov hisoblanadi. Qoidalar buzilsa, jurnalistning ruxsatnomasi bekor qilinishi yoki Pentagonga kirish huquqidan mahrum etilishi mumkin.
Mudofaa vazirligi (yaqinda prezident Donald Tramp ma’muriyati tomonidan qo‘shimcha ravishda «urush vazirligi» deb atalgan) bunday cheklovlarni milliy xavfsizlikka tahdid va xodimlar xavfsizligi bilan izohladi. Mudofaa vaziri Pit Hegset oxirgi oylarda jurnalistlar faoliyatini tobora cheklab, Pentagon xodimlarining matbuot bilan to‘g‘ridan to‘g‘ri muloqotini ham qisqartirgani qayd etilmoqda.
Fevralda Hegset The New York Times va NBC News kabi yirik nashrlarning maxsus byurolarini yo‘qotib, ularning o‘rniga Newsmax va Breitbart kabi konservativ media tashkilotlarini pulga kiritgan edi.
Qaror AQSHda kuchli tanqidlarga sabab bo‘ldi. «Milliy press-klub» rahbari Mayk Balsamo: «Agar har bir xabar hukumat tomonidan tasdiqlanishi shart bo‘lsa, jamoatchilik mustaqil axborotdan mahrum bo‘ladi. Bu har bir amerikalikni tashvishga solishi kerak», — dedi.
20 sentyabr kuni Hegset ijtimoiy tarmoqda o‘z pozitsiyasini qo‘shimcha izohlab, «Pentagonni matbuot emas, odamlar boshqaradi. Qoidalarga rioya qiling yoki uyingizga keting», — deb yozdi.
