Pokiston Donald Trampni 2026 yildagi Nobel tinchlik mukofotiga tavsiya etdi

Pokiston rasmiylari 2025 yilda yuzaga kelgan Hindiston-Pokiston mojarosida Donald Tramp tomonidan amalga oshirilgan diplomatik sa’y-harakatlarni tinchlik uchun o‘ta muhim va samarali deb baholadi. Rasmiy Islomobodning bayonotida aytilishicha, Trampning ikki tomon bilan olib borgan diplomatik muloqoti harbiy to‘qnashuvning kengayib ketishiga yo‘l qo‘ymagan va yadroviy davlatlar o‘rtasida keng ko‘lamli urushning oldini olgan. Pokiston tomoni mojaro chog‘ida o‘zini himoya qilish huquqidan foydalangan holda «Bunyanum Marsoos» deb nomlangan harbiy operatsiyani o‘tkazganini qayd etdi. Operatsiya aniq, chegaralangan va faqat salohiyatli harbiy ob’ektlarga qaratilgan bo‘lib, tinch aholi orasida yo‘qotishlarning oldini olishga uringan. Hukumatning bayonotida Trampning Janubiy Osiyodagi barqarorlikka qaratilgan sa’y-harakatlari, xususan, Jammu va Kashmir masalasini hal qilishga bo‘lgan takliflari ham alohida e’tirof etildi. Pokiston bu muammo BMT Xavfsizlik kengashining rezolyutsiyalari asosida hal etilmaguncha mintaqada barqaror tinchlikka erishish qiyin bo‘lishini ta’kidladi. Pokiston hukumati, shuningdek, Trampning G‘azodagi insonparvarlik fojiasi va Eron atrofida kuchayotgan mojarolarga bo‘lgan e’tiborini ham qayd etgan holda, uning xalqaro tinchlik va barqarorlikni ta’minlashga qaratilgan sa’y-harakatlari davom etadi, deb umid bildirdi.