Путин Трампнинг «қисқартирилган» тинчлик режасини рад этиши мумкин
Трамп маъмурияти Европа билан музокараларда қисқартирилган янги тинчлик режаси лойиҳасини Россия қабул қилмаслигидан жиддий хавотирга тушган.
The New York Times хабар беришича, Доналд Трамп маъмурияти Украина бўйича қайта ишланган тинчлик режаси Россия президенти Владимир Путин томонидан рад этилиши мумкинлигидан хавотирга тушган. Режанинг аввалги варианти Донбассдан воз кечиш, НАТОга киришдан воз кечиш ва Россияга қарши санкцияларни бекор қилишни ўз ичига олган эди.
Бироқ Женевада ўтказилган музокаралардан сўнг, режа 28 пунктдан 19 тагача қисқартирилган. Айрим талаблар — Украина қуролли кучлари сонини чеклаш ва НАТО аъзолигини тақиқлаш — ҳужжатдан олиб ташланган. Володимир Зеленский эса ҳудудий масалаларни Трампнинг ўзи билан муҳокама қилиш ниятида экани таъкидланди.
Франция ва Британия Украинага тинчликпарвар кучлар юборишга тайёрлигини билдирди. Эммануэл Макронга кўра, бу кучлар таркибига Туркия ҳам қўшилиши мумкин. Шу билан бирга, Россия Ташқи ишлар вазири Сергей Лавров агар ҳужжатда «Анкориж руҳи» бузилса, бу «тамомила бошқа вазият»га олиб келиши ҳақида огоҳлантирди.
Дмитрий Песков эса Трампнинг дастлабки режасини «муҳим ва асосий» деб атади. Кремл унга ҳали ҳам умид боғлаб турганини билдирди. Лекин Carnegie маркази таҳлилчиси Татяна Становаянга кўра, бу режа — Россиянинг апрелдаги талабларини қайта ишланган шаклдагина акс эттиради.
The Washington Post манбаси эса Кремл бу режани етарли деб ҳисобламаслигини, Россия Ғарб ёрдамида қайта куч тўплаб, яна урушни давом эттиришини тахмин қилмоқда.
