Путин ва Украина уруши тақдири

2026-йил бошида Россия иқтисодиёти Украинадаги уруш ва Ғарб санкцияларининг оқибатларини тўлиқ ҳис қила бошлади. Бюджет даромадлари камайди, ишлаб чиқариш пасайди, ташқи савдо қисқарди (Россия Ҳиндистонга нефтни баррелига 22 доллардан сотишга мажбур бўлмоқда — бу бозор нархининг қарийб учдан бири демакдир). Бизнесни ривожлантириш деярли тўхтаб қолди. Бу ҳақда журналист Михаил Зигар «The New York Times»даги мақоласида ёзган.

Унинг таъкидлашича, яқин вақтгача Путин иқтисодий аҳвол ёмонлашаётгани ҳақидаги сигналларни эътиборсиз қолдириб келаётган эди. Аммо 2026-йил февралида у бунга эътибор қарата бошлади ва низодан чиқиш йўллари ҳақида ўйлаб қолди. Зигарнинг маълумотларига кўра, АҚШ билан «Украина масаласи» бўйича бош музокарачини алмаштириш муҳокама қилинган — Кирилл Дмитриев ўрнига Путинга яқин бўлган Игор Сечин келиши керак эди. Ҳатто ҳукумат алмашиши ҳақида миш-мишлар тарқалди.

Бироқ «Медуза» манбаларининг таъкидлашича, Кремлда Украина билан тинчлик шартномаси тузиш режаси йўқ. Хусусан, Президент администрацияси сентябрда бўлиб ўтадиган Давлат Думаси сайловларига уруш аввалги шиддат билан давом этади деган ғоя асосида тайёргарлик кўрмоқда. 24-март куни «Единая Россия» сайловолди кампаниясининг асосий тезисларидан бири сифатида «Партиянинг сайловдаги ишончли ғалабаси фронтдаги ғалабани яқинлаштиради» деган ғоя илгари сурилди.

Аммо АҚШ ва Исроилнинг Эронга ҳужуми туфайли ҳамма нарса ўзгариб кетди. Эрон Ормуз бўғозини тўсиб қўйди, нефт нархи кўтарилди ва дунё бозорини барқарорлаштириш учун Россия нефтига қўйилган санкциялар вақтинча юмшатилди. АҚШ ва унинг иттифоқчилари ўртасида келишмовчиликлар кучайди — кўпчилик Доналд Трампнинг чақириқларига қарамай, Эрон билан урушда иштирок этишни истамади. Россия-Украина уруши сиёсий ва медиа кун тартибида иккинчи планга ўтди. Украинага Ғарбдан келадиган қуроллар камайиши мумкинлиги ҳақида тахминлар бор.

Бундан ташқари, Кремл кузда АҚШ Конгрессига бўладиган сайловларда Республикачилар партияси мағлуб бўлишини кутмоқда. Бу Трампни заифлаштиради ва Путиннинг «Америка президентлари ўткинчи, шунчаки янгиси келишини кутиш ва қайтадан келишиш мумкин» деган фикрини тасдиқлайди.

«Бироқ, Россия раҳбариятига яқин одамлар буларнинг ҳаммаси вақтинчалик енгиллик эканини тушунишади. Улар сентябрдаги сайловларни ҳаяжон билан кутишмоқда. Ҳукумат «Telegram»ни тақиқламоқда ва Россияни интернетдан узиб қўйишга ҳаракат қилмоқда. Зигарнинг фикрича, тез орада Путин танлов қилишига тўғри келади: ё Украинада деэскалацияга рози бўлиш, ёки янги сафарбарликкача бўлган босимни янада кучайтириш. Унинг қарорига АҚШнинг Эронга нисбати хатти-ҳаракатлари ҳам таъсир қилади», - дея хулоса қилади журналист.