Қозоғистон иқтисодиёти йил бошидан бери 3,6 фоизга ўсди

Қозоғистон ялпи ички маҳсулоти 2026-йилнинг январ–апрел ойларида 3,6 фоизга ўсди. Бунда қайта ишлаш саноатида ишлаб чиқариш ҳажми 9,9 фоизга ошган. Бу ҳақда Қозоғистон миллий иқтисодиёт вазирлиги матбуот хизмати маълум қилди.

Тўрт ой якунларига кўра, саноат ишлаб чиқариши ижобий ҳудудга чиққан – жисмоний ҳажм индекси 102,1 фоизни ташкил этган. Вазирлик маълумотига кўра, 2026-йил январ–апрел ойларида Қозоғистон иқтисодиётининг ўсиши ўтган йилнинг шу даврига нисбатан 3,6 фоизни ташкил этган.

Айниқса машинасозлик соҳасида юқори ўсиш суръатлари сақланиб қолмоқда – ўсиш 23,3 фоизни ташкил этган. Бу транспорт воситалари, қишлоқ хўжалиги ва темирйўл техникаси, электр маҳсулотлари ҳамда ускуналар ишлаб чиқариш ҳажмининг кўпайиши билан изоҳланган.

Ўсиш суръати юқори соҳалар

Шунингдек, қуйидаги соҳаларда ҳам юқори ўсиш кузатилган:
енгил саноат – 2,3 баробар;
мебел ишлаб чиқариш – 41,7 фоиз;
фармацевтика – 35,2 фоиз;
қурилиш материаллари – 27,7 фоиз;
кимё саноати – 18,4 фоиз;
озиқ-овқат маҳсулотлари ишлаб чиқариши – 14,4 фоиз.

Маълумотларга кўра, йилнинг дастлабки тўрт ойида иқтисодиётдаги ижобий динамикани асосий тармоқлардаги барқарор ўсиш таъминлаган.
Энг юқори ўсиш суръатлари қуйидаги соҳаларда қайд этилган:
қурилиш – 114,5 фоиз;
транспорт ва омборлаш – 112 фоиз;
қайта ишлаш саноати – 109,9 фоиз;
савдо – 105,1 фоиз;
қишлоқ хўжалиги – 103,6 фоиз.

ЯИМнинг реал ўсиш тузилмаси хомашёга боғлиқ бўлмаган тармоқлар, хусусан қурилиш, транспорт, савдо ва қайта ишлаш саноатининг роли кучайиб бораётганини кўрсатмоқда.