Rossiya Davlat dumasi Telegram va WhatsApp’da ro‘yxatdan o‘tishni bloklashni ma’qulladi

Rossiya Davlat dumasi axborot siyosati bo‘yicha qo‘mitasi Telegram va WhatsApp messenjerlarida ro‘yxatdan o‘tish uchun SMS va qo‘ng‘iroqlarni bloklashni qo‘llab-quvvatladi. Qo‘mita raisi o‘rinbosari Aleksandr Yushchenko bu qarorni «to‘g‘ri va zamon talabiga mos», deb atadi. Uning so‘zlariga ko‘ra, bu chora Rossiyaning davlat messenjeri Max platformasini qo‘llab-quvvatlash maqsadida joriy etilgan.

«Bu cheklov foydalanuvchilarga jiddiy ta’sir qilmaydi. Bu, aksincha, ichki raqamli mahsulotni rivojlantirishga yordam beradi», — dedi Yushchenko «Pod’yom» nashriga bergan izohida. U shunday qo‘shimcha ham qildi: «Kim WhatsApp yoki Telegram’dan foydalanishni xohlagan bo‘lsa, allaqachon ro‘yxatdan o‘tgan. Qolganlar esa Max’ga o‘tishi mumkin — bu mutlaqo odatiy jarayon».

Yushchenko, shuningdek, bu cheklovni qonun darajasida mustahkamlash «mantiqan to‘g‘ri bo‘lishi»ni ta’kidladi. Unga ko‘ra, davlatning maqsadi — xorijiy messenjerlar faoliyatini qiyinlashtirish va milliy raqamli infratuzilmaga ustuvorlik berish.

Axborot qo‘mitasi rahbarining o‘rinbosari Oleg Matveychev ham WhatsApp’da ro‘yxatdan o‘tishni taqiqlash tashabbusini qo‘llab-quvvatladi. Uning fikricha, kompaniya Rossiya qonunlariga bo‘ysunib ish tutmayotgani sababli uning faoliyati cheklanishi kerak. Matveychev WhatsApp’ni «qonunbuzar migrant»ga qiyoslab, «bunday holatda deportatsiya zarur», degan tashbehni keltirdi.

Avvalroq «Kod Durova» internet-nashri tomonidan Rossiya telekom bozoridagi manbalarga tayanib, ayrim mobil operatorlar Telegram va WhatsApp uchun SMS va qo‘ng‘iroqlar orqali ro‘yxatdan o‘tish kodlarini bloklay boshlaganini xabar qilingan edi.