Россия генераллари Путинга ваъда қилинган фронт қулашини амалга ошира олмади

Reuters агентлигининг ёзишича, Россия Бош штаби август бошида Владимир Путинга Украина фронти 2–3 ой ичида, яъни ноябрга қадар емирилиши ҳақида ваъда берган. Бироқ бу муддат тугаб бораётган бўлса-да, Россия армияси сезиларли ютуқларга эриша олмаган.

Маълумотларга кўра, жорий йилнинг июн ойидан буён бошланган ёзги ҳужум давомида Россия қўшинлари Украина ҳудудининг атиги 0,4 фоизини эгаллай олди. Бундай суръатда Донецк, Луҳанск, Херсон ва Запорижжя областларини тўлиқ босиб олиш учун Россияга 100 йилдан зиёд вақт керак бўлади.

Австриядаги Винер-Нойштадт ҳарбий академияси профессори, эксперт Маркус Райснер таъкидлашича, Россия фронтни ёриб ўта олмаган бўлса-да, ҳозирча ташаббус унда қолмоқда — бироқ бу «тошбақа тезлигида илгарилаш». Унинг сўзларига кўра, сўнгги ҳафталарда Покровск атрофидаги вазият кескин ёмонлашган. Россия армияси Донбассдаги бу шаҳарни қамалга олиш учун 11 минг аскар йўллаган, умумий ҳисобда эса минтақада 170 минг ҳарбий тўпланган.

Покровск яқин ҳафталарда қулаши мумкин, аммо бу Россия учун «оператив бурилиш» бўлмайди, дейди Райснер. Урушдан аввал 400 мингга яқин аҳоли яшаган, йилига 2 млн тоннадан зиёд кўмир ишлаб чиқарган шаҳар ҳозирда вайронага айланган ва аҳолисининг 99 фоизини йўқотган. Россия бу ҳудудни 2024 йил бошидан бери эгаллашга уриниб келмоқда.

Экспертнинг таъкидлашича, фронтнинг бошқа беш нуқтаси — Купянск, Лиман, Северск, Новопавливка ва Константинивка ҳам доимий жанговар ҳолатда. Украина дронлардан фойдаланиб, ресурс ва инсон етишмаслигини бартараф этмоқда. Россия эса фронт бўйлаб бир вақтнинг ўзида кўплаб бирваракай ҳужумлар ташкил этмоқда, бу эса шаҳарларни кетма-кет вайрон қилиш хавфини кучайтиради.

NBC манбаларига кўра, Путин фронтдаги муваффақиятсизликка қарамасдан, урушни давом эттириш ниятида. Вашингтондаги манбалар Россия раҳбари иқтисодий инқироз ва жамиятдаги толиқишга қарамасдан, янги ҳудудларни босиб олиш орқали урушни оқлашга ҳаракат қилаётганини билдирмоқда.

Маркус Райснернинг сўзларига кўра, Путин бир вақтнинг ўзида янги можароларга тайёргарлик кўрмоқда ва Россия ҳарбий салоҳиятини ошириш устида ишлаяпти. «Бу саъй-ҳаракатлар қанчалик самара беради — буни санкциялар таъсири ва иқтисодий натижалар кўрсатади. Аммо ҳозирча Россия узоқ давом этадиган урушга тайёргарлик кўраётгани аниқ», — деди у.