Россия Марказий банки раиси йўқолиб қолдими?

Россия Марказий банки раиси Элвира Набиуллина сўнгги бир ҳафтадан зиёд вақт ичида бир қатор муҳим тадбирларда иштирок этмагани мамлакат сиёсий ва иқтисодий доираларида турли тахминларни келтириб чиқарди. У 4 июн куни Санкт-Петербург халқаро иқтисодий форумида, 9 июн куни НАУФОР конференциясида ҳамда 10 июн куни президент Владимир Путин иштирокида ўтказилган инфляция ва асосий ставка масалаларига бағишланган йиғилишда қатнашмади.

Набиуллинанинг тадбирларда иштирок этмаслиги сабаби

Россия Марказий банки матбуот хизмати Набиуллинанинг тадбирларда иштирок этмаслигига касаллиги сабаб бўлганини маълум қилди. Кремл матбуот котиби Дмитрий Песков ҳам унинг ҳали тўлиқ соғаймаганини билдириб, бу ҳолат атрофида фитна назариялари яратмасликка чақирди. Шу билан бирга, Набиуллинанинг қандай касалликка чалингани ва қачон ишга қайтиши ҳақида расмий маълумот берилмаган.

Оммавий ахборот воситалари ва экспертлар Набиуллинанинг йўқлигига турлича изоҳ бермоқда. Аввалроқ унинг Петербург иқтисодий форумида иштирокчилар рўйхатидан чиқиб кетгани маълум бўлган, бу эса турли тахминларга сабаб бўлган. Кейинчалик маълум бўлишича, у маслаҳатчиси Алексей Можиннинг видолашув маросимида ҳам қатнашмаган.

Муҳокамаларнинг яна бир сабаби Набиуллинанинг ваколат муддати билан боғлиқ. У ҳозир Марказий банк раҳбари сифатида учинчи муддатини ўтамоқда ва амалдаги қонунчиликка кўра, бу унинг охирги муддати ҳисобланади. Ваколатлари 2027 йил июн ойида тугайди. The Bell нашри маълумотига кўра, унинг эҳтимолий ворислари сифатида Максим Орешкин, Пётр Фрадков ва Андрей Костин номлари тилга олинмоқда.

Экспертлар таъкидлашича, Россия Марказий банки мамлакатнинг пул-кредит сиёсати ва молия тизими барқарорлигида ҳал қилувчи ўрин тутади. Набиуллина эса сўнгги йилларда иқтисодий қарорлар қабул қилишдаги таъсирчан фигура сифатида шаклланган. Шу сабабли унинг эҳтимолий кетиши ёки ваколатларининг узайтирилиши Россия иқтисодиёти учун муҳим сиёсий ва молиявий оқибатларга олиб келиши мумкин.