Россия ўзининг энг дахшатли ракетасини Беларус шарқига жойлаштирган — АҚШ экспертлари
Сунъий йўлдош тасвирлари Беларус шарқида ядровий каллак ташийдиган ракета жойлаштирилганини кўрсатди.
Америкалик тадқиқотчилар сунъий йўлдош орқали олинган суратларга таяниб, Беларус шарқида ядровий каллакларни ташишга қодир бўлган Россиянинг янги «Орешник» гипертовушли баллистик ракеталари жойлаштирилганини маълум қилди. Бу ҳақда Reuters агентлиги хабар бермоқда.
Миддлбери халқаро тадқиқотлар институти экспертлари Жеффри Люис ва Майкл Дуйтсман ҳамда CNA таҳлилчиси Деккер Эвелет Планет Labs суратларини таҳлил қилиб, ушбу ракета тизимининг жойлашувини аниқлаган.
Экспертларнинг хулосасига кўра, мажмуа Минскдан тахминан 307 км шарқда ва Москвадан 478 км жануби-ғарбда жойлашган Кричев шаҳри яқинидаги собиқ «Кричев-6» ҳарбий аэродромига ўрнатилган. Ушбу объект Россиянинг Смоленск вилояти чегарасидан атиги беш километр узоқликда жойлашган бўлиб, у ердан Украина чегарасигача 180 километр, Латвиягача 370 километр, Литвагача 400 километр ва Полшагача 540 километр масофа мавжуд.
Тадқиқотчилар Reuters агентлигига сунъий йўлдош суратларига айнан «Орешник» тушганига 90 фоиз ишончлари комил эканини билдирган. Агентлик манбасининг таъкидлашича, ушбу тахмин Америка разведкасининг хулосалари билан ҳам мос келади.
Аввалроқ, Александр Лукашенко «Орешник» ракета мажмуаси 17 декабрдан буён мамлакатда жанговар навбатчиликка киришганини маълум қилган эди.
«Орешник» — ўрта масофага мўлжалланган экспериментал баллистик ракета тизими бўлиб, унинг парвоз масофаси 5500 километрни ташкил этиши тахмин қилинади. Россия Қуролли кучлари ушбу тизимни илк бор 2024 йил ноябр ойида Украинанинг Днепр шаҳрига берган ракета зарбасида қўллаган эди.
