Rossiya Ukraina energetika tizimiga zarbalarni qayta boshladi

Ukraina energetika vaziri German Galushchenko Rossiya so‘nggi haftalarda mamlakat energetika infratuzilmasiga qarshi keng ko‘lamli hujumlarni qayta boshlaganini ma’lum qildi. Uning ta’kidlashicha, ayniqsa front yaqinidagi hududlarda vaziyat yanada keskinlashgan. Galushchenko so‘zlariga ko‘ra, hozircha Ukraina energetika tizimi barqaror ishlamoqda va navbatli elektr uzilishlari xavfi yo‘q. Biroq yangi ommaviy zarbalar yuz bersa, bu holat o‘zgarishi mumkin. U shunga qaramasdan mamlakatda yetarli miqdorda ko‘mir, yadro yoqilg‘isi va gaz zaxirasi borligini ma’lum qildi. Vazir ta’kidlashicha, qishda Ukrainada elektr energiyasiga bo‘lgan ehtiyojning 60 foizi atom elektr stansiyalarida ishlab chiqarilgan energiya hisobiga qoplanishi rejalashtirilgan. Rasmiy ma’lumotlarga ko‘ra, o‘tgan 2023 yil davomida Rossiya Ukraina energetika infratuzilmasiga 33 marta keng ko‘lamli hujum uyushtirgan. Ularda minglab raketalar va o‘n minglab uchuvchisiz uchish apparatlari qo‘llanilgan. Hozirda energetika tizimining xavfsizligini ta’minlash va kelgusi hujumlarga tayyorgarlik ko‘rish Ukraina hukumati oldidagi eng ustuvor vazifalardan biri bo‘lib turibdi.