Rossiya Ukrainaning Samar shahriga raketa zarbasi berdi
28.06.2025 | 08:4040143
27 iyun kuni Rossiya armiyasi Dnepropetrovsk oblastida joylashgan Samar shahriga raketalar bilan hujum qildi. Oblast rasmiylariga ko‘ra, o‘nlab jabrlanganlar bor.
27 iyun kuni tushdan keyin Rossiya Qurolli kuchlari Ukrainaning Dnepropetrovsk oblastida joylashgan Samar shahriga navbatdagi raketa hujumini amalga oshirdi. Bu haqda oblast rahbari Sergey Lisak o‘z Telegram sahifasida ma’lum qildi.
Hujum oqibatida to‘rt kishi halok bo‘lgani va yana 17 kishi turli darajada tan jarohati olgani aytilmoqda. Jarohatlanganlardan uch nafari juda og‘ir ahvolda shifoxonaga yetkazilgan. Hujum oqibatida mahalliy infratuzilma ham ziyon ko‘rgani xabar qilindi.
Lisakning so‘zlariga ko‘ra, bugungacha Dnepropetrovsk oblastiga uyushtirilgan hujumlar oqibatida kamida 340 nafar fuqaro halok bo‘lgan, ular orasida 38 nafar bola ham bor.
Shuningdek, Ukraina Harbiy havo kuchlari 27 iyunga o‘tar kechasi Rossiya tomonidan 370 ta uchuvchisiz raketa uchirilganini ma’lum qildi. Ular raketalarning deyarli barchasini yo‘q qilishga muvaffaq bo‘lganini bildirdi.
Rossiyaning Ukraina hududlariga qarshi bunday hujumlari tinch aholi hayotiga jiddiy tahdid solishda davom etmoqda. Ukraina rasmiylari xalqaro hamjamiyatni vaziyatga munosabat bildirishga chaqirmoqda.
