Rossiya va Ukraina yana Istanbulda to‘g‘ridan to‘g‘ri muzokara o‘tkazishni muhokama qilmoqda
29.05.2025 | 08:154833
Rossiya tashqi ishlar vaziri Sergey Lavrovning ma’lum qilishicha, Moskva 2 iyun kuni Istanbulda Ukraina bilan to‘g‘ridan-to‘g‘ri muzokara o‘tkazishni taklif qilgan. Vladimir Medinskiy rahbarligidagi guruh bu uchrashuvda «ukrain inqirozini barqaror bartaraf etish» yuzasidan memorandum taqdim etishga tayyor.
Rossiya tomoni tayyorlagan hujjatda Ukrainadagi mojaroni keltirib chiqargan barcha omillar bo‘yicha o‘z pozitsiyasi bayon etilgani aytilmoqda. Lavrov yangi Istanbul muzokaralari xalqaro hamjamiyat tomonidan qo‘llab-quvvatlanishiga umid bildirdi.
Shu bilan birga, Ukraina mudofaa vaziri Rustem Umerov Rossiya delegatsiyasiga Kiyevning rasmiy pozitsiyasi aks etgan memorandumni taqdim etganini ma’lum qildi. Uning so‘zlariga ko‘ra, Ukraina to‘liq va shartsiz otashkesimga tayyorligini yana bir bor tasdiqlagan.
Umerov Rossiyadan o‘z memorandumini 2 iyungacha taqdim etishni so‘ragan. U muzokara samarali o‘tishi uchun tomonlar oldindan hujjatlar bilan tanishishi kerakligini ta’kidladi. Ukraina rasmiylariga ko‘ra, uchrashuv faqat real diplomatik ilgarilashga xizmat qilsa, o‘rinli bo‘ladi.
2022 yilda to‘xtab qolgan Istanbul muzokaralarini qayta jonlantirish urinishlari jahon hamjamiyati tomonidan diqqat bilan kuzatilmoqda. 2 iyun kuni bo‘lib o‘tishi mumkin bo‘lgan uchrashuv mojaroga diplomatik yechim izlashdagi navbatdagi jiddiy qadam sifatida baholanmoqda.
Meta description:
