Россияда аввалроқ секинлаштирилган «YouTube» энди тўлиқ блокланди
«Роскомнадзор» бир ярим йиллик «секинлаштириш»дан сўнг «YouTube»ни Россияда де-факто тўлиқ блоклаб, сервисга киришни VPNсиз мутлақо имконсиз ҳолатга келтирди.
Россияда «YouTube»нинг ишлаши амалда тўхтатилди. IT-мутахассисларнинг маълум қилишича, «Роскомнадзор» видеоҳостинг доменини назорат қилинадиган DNS-серверлар рўйхатидан чиқарган. Натижада, фойдаланувчи «YouTube»га кирмоқчи бўлганда, роутер сайт манзилини IP билан боғлай олмайди ва хатолик чиқади.
«Эксплойт» изоҳига кўра, бу усул сервисни VPNсиз бутунлай ишламайдиган қилади. Блокировкада «суверен Рунет» учун яратилган Миллий домен номлари тизими қўлланилган. Ушбу тизимдан барча операторлар 2021 йилдан фойдаланиши шарт. Шу орқали регулятор сайтларга киришни марказлашган ҳолда бошқара олади.
Нима учун айнан ҳозир?
«Ултиматек» инфратузилма интегратори бошқарувчи директори Жемали Авалишвили «РБК» нашрига берган интервюсида «Роскомнадзор» назоратидаги DNS-серверлар «YouTube» учун тўғри манзилларни қайтармаётганини тасдиқлади.
Телеком-эксперт Алексей Учакин эса блокировка «Telegram»га қарши чекловлар кучайтирилган пайтга тўғри келганига эътибор қаратди. Унинг фикрича, тармоқ провайдерларига ўрнатилган трафик филтрацияси ускуналари икки йирик сервисни бир вақтнинг ўзида секинлаштиришга қодир эмас. Шу боис «қўпол, аммо ишончли ўчиргич» танланган. Илгари «Discord» ва «Signal» ҳам худди шу усулда блокланган эди.
VPN орқали ишлайди
«Софтлайн» таркибига кирувчи «MD Audit» компаниясининг DevOPS бўлими раҳбари Александр Демин блокировка техник жиҳатдан энг оддий усул эканини таъкидлади. Унинг сўзларига кўра, «YouTube»нинг барча дата-марказлари ва контент тарқатиш тармоқлари ишлашда давом этмоқда.
Шу сабабли альтернатив DNS ёки VPN орқали сервисга кириш мумкин. Бироқ оддий фойдаланувчи учун «YouTube» Россия ҳудудида амалда ёпилди.
«YouTube» биринчи марта 2024 йил июл ойида секинлаштирилган эди. Аввалига бу «Google» серверлари билан боғлиқ «техник муаммолар» деб изоҳланган, кейин эса регулятор чекловларни очиқ тан олган. Сабаб сифатида «қонун бузилиши» ва 200 дан ортиқ Россия пропаганда каналларининг блоклангани кўрсатилган.
Шунга қарамай, 2026 йил январда «YouTube»га 65,9 млн россиялик кирган, кунлик аудитория 22 млн нафарни ташкил этган.
