Россияда Telegram тўлиқ блокланиши Янги йилгача амалга ошиши мумкин

Россияда Telegram мессенжери Янги йилгача тўлиқ блокланиши мумкин. Бу ҳақда «Дожд» телеканалига маълум қилган телеком соҳаси вакиллари билдирган. Уларга кўра, мамлакатдаги энг оммабоп мессенжер — 100 млн фойдаланувчига эга Telegram декабр–январ ойларида фаолият кўрсатмай қолиши мумкин.

22 октябр куни Роскомнадзор расман Telegram ва WhatsApp хизматларини чеклаш бошланганини маълум қилди. Ведомство бу қарорни «жиноятчиларга қарши курашиш» ва «фуқароларнинг кўплаб мурожаатлари» асосида қабул қилганини айтди. Маълумотга кўра, ҳар икки мессенжер Россия ҳукуматининг талабларини инобатга олмаган.

«Интернетни ҳимоя қилиш жамияти» раҳбари Михаил Климарёв бу жараённи «YouTube билан бўлган вазиятнинг такрори» деб атади. Унинг фикрича, Telegram декабр ёки январда тўлиқ блокланади. Унга кўра, Россия бўйлаб ҳар икки мессенжернинг фаолияти икки баробар пасайган, Signal хизмати ҳам муаммоларни бошдан кечирмоқда.

20 октябр куни Россиянинг жанубий ҳудудларида мессенжер орқали ёзишма ва қўнғироқлар йўқолиши ҳақида илк шикоятлар келиб тушган. Кейин блоклаш Урал ва марказий ҳудудларга ҳам ёйилган. 22 октябрга келиб, чекловлар 34 та субъектда қайд этилган.

Климарёвнинг таъкидлашича, ҳукумат мессенжерларни босқичма-босқич «бўғиш» тактикасига ўтган — аввал стационар операторларда, кейин мобил алоқаларда.

Human Rights Watch тадқиқотчиси Анастасия Крупе эса бу жараённи Кремл интернет устидан тўлиқ назорат ўрнатиш ҳаракати деб баҳолаган. Унинг фикрича, Россия интернетни ички изоляцияда ҳам мустақил бошқаришни мақсад қилган.