Rossiyaliklarning 83 foizi urushdan charchaganini tan oldi — OAV
Kreml buyurtmasiga ko‘ra o‘tkazilgan yopiq so‘rov natijalariga ko‘ra, rossiyaliklarning ko‘pchiligi urushdan charchagan, aholida kayfiyat keskin pasaygan.
Rossiyada o‘tkazilgan yopiq sotsiologik so‘rov natijalari jamoatchilik kayfiyati keskin o‘zgarganini ko‘rsatmoqda. Kreml buyurtmasiga ko‘ra Butunrossiya jamoatchilik fikrini o‘rganish markazi (VSIOM) tomonidan amalga oshirilgan tadqiqotda rossiyaliklarning 56 foizi «SVOdan juda charchaganini», yana 27 foizi esa «qisman roziligini» bildirgan. Ya’ni umumiy hisobda 83 foiz fuqaro urushdan charchaganini ochiq aytgan.
So‘rov natijalariga ko‘ra, urushni davom ettirishni qo‘llab-quvvatlayotganlar ulushi 20 foizdan kamga tushgan. Bu esa Rossiya jamiyatida hukumatning tashqi siyosatini yorqin qo‘llab-quvvatlash ilgari kuzatilgan darajada emasligini ko‘rsatadi. Sotsiologlar fikricha, 2024 yil oxiridan beri kayfiyat keskin yomonlashgan.
Bunga asosiy sabablardan biri — iqtisodiy ahvol. Inflyatsiyaning o‘sishi, daromadlar stagnatsiyasi va hukumat tomonidan soliq yukining ortishi armiyani moliyalashtirish maqsadiga xizmat qilmoqda. Zvonovskiy va Xodikin kabi tadqiqotchilarning ta’kidlashicha, har bir «yashash osonlashdi» degan shaxsga qarshi uch kishi «yashash yomonlashdi» deb javob bermoqda.
Shu bilan birga, Kreml senzuraga munosabatni ham o‘rganmoqda. So‘rov natijalariga ko‘ra, rossiyaliklarning faqat 24 foizi g‘arb platformalarining bloklanishini qo‘llab-quvvatlagan, 39 foizi esa bunga qarshi. Qolgan 30 foiz esa aniq pozitsiya bildirmagan.
Yoshlar buni shaxsiy hayotga aralashish sifatida baholamoqda, katta yoshdagilar esa «davlat va tartibni himoya qilish» deb qabul qilmoqda.
