Россиянинг урушдаги қурбонлари ойига 30 мингга етди — НАТО
НАТО раҳбарияти жанггоҳларда Россия армиясида йўқотишлар кескин ошганини айтар экан, бу рақамлар уруш динамикаси ва Украинага ёрдам масаласини яна кун тартибига чиқарди.
НАТО бош котиби Марк Рютте Давосда ўтаётган Жаҳон иқтисодий форумида Россиянинг Украинага қарши урушдаги йўқотишлари кескин ошганини маълум қилди.
«Декабр ойида россияликлар ҳар куни ўртача минг нафар жангчисидан ажралган — тикланмас тарзда яраланганлар эмас, айнан ўлдирилиши натижасида», — деган Рютте.
Бу бир ой ичида 30 мингдан ортиқ қурбон дегани.
У НАТО баҳолашларига таяниб, бу кўрсаткичларни тарихий солиштириш билан изоҳлади. Хусусан, у СССР Афғонистондаги ўн йиллик уруш давомида тахминан 20 минг нафар аскарни йўқотганини эслатди. Рюттенинг таъкидлашича, бундай катта йўқотишларга қарамай, Россия армияси ҳужум ҳаракатларини тўхтатмаяпти ва бу Украинага кўмакни кучайтириш зарурлигини кўрсатади.
Йўқотишлар кўлами
Бундан олдин ҳам NATO раҳбари Россия ҳар ой Украинада 20–25 минг атрофида қурбон берётганини айтган эди. Шу ҳисоб-китобларга кўра, 2025 йил давомида Россия армиясининг тикланмас йўқотишлари 240 мингдан 300 минг нафаргача етиши мумкин. НАТОнинг умумий баҳолашларига кўра, «махсус ҳарбий операция» деб аталган уруш бошланганидан бери Россиянинг жами йўқотишлари 2025 йил декабрига келиб 1,15 миллион нафарга етган.
Шу қурбонлар орасида тахминан 400 минг киши оғир жароҳат олиб, ногирон бўлиб қолган. Бу рақам алоҳида аҳамиятга эга, чунки у Брянск ёки Твер шаҳри аҳолиси сонига яқин. Экспертлар бундай йўқотишлар Россия жамияти ва меҳнат бозорига узоқ муддатли салбий таъсир кўрсатишини таъкидламоқда.
Кадр муаммоси кучаймоқда
Ҳозир Россия фронтдаги йўқотишларни асосан шартнома асосида хизматга жалб этилганлар ҳисобидан қопламоқда. Россия Хавфсизлик кенгаши раисининг ўринбосари Дмитрий Медведев маълум қилишича, ўтган йилда 422 704 нафар киши мудофаа вазирлиги билан шартнома имзолаган, яна 32 минг нафар ихтиёрий отрядларга қўшилган. Бироқ бу рақамлар аввалги йилга нисбатан пасайишни кўрсатмоқда.
«Вёрстка» манбаларига кўра, 2025 йилда шартнома асосида аскарларни жалб қилишда деярли барча ҳудудларда камчилик кузатилган. Москвада ҳам бу кўрсаткич 25 фоизга камайган. Манбалар россияликларнинг урушдан чарчагани ва фронтга боришни истаганлар аллақачон кетиб бўлгани сабаб, энди одамларни турли йўллар билан алдаш ҳолатлари кўпайганини қайд этмоқда.
