Сержио Гор: «АҚШ Марказий Осиё давлатлари билан ҳамкорлик қилишни истайди»
Вашингтон келгуси уч йилда минтақада сиёсий ва иқтисодий ҳамкорликни кучайтиришга қаратилган янги сиёсат юритмоқчи.
АҚШ узоқ вақт давомида Марказий Осиёга етарли даражада эътибор қаратмаганини ва бу йўналишдаги сиёсатни ўзгартириш ниятида эканини маълум қилди. Бу ҳақда АҚШ президентининг махсус элчиси Сержио Гор Бишкек шаҳрида журналистлар билан учрашув пайтида билдирди.
АҚШнинг келгуси 3 йиллик сиёсати Марказий Осиё билан ҳамкорлик асосида қурилади
«Мен сизларга президент Доналд Трамп номидан оддий хабарни етказмоқчиман: Қўшма Штатлар ҳамкорлик қилишни истайди ва минтақани ташқи сиёсатда устувор йўналиш сифатида белгилайди», деди у.
Элчининг таъкидлашича, Трамп раҳбарлигида Вашингтон аввалги камчиликларни бартараф этишга қарор қилган. Унинг сўзларига кўра, АҚШ технологиялар, сармоя ва имкониятлар нуқтаи назаридан минтақавий шериклар учун муҳим ҳамкор бўла олади ва бу ўзаро манфаатли жараёндир.
Сержио Гор 2025 йилда Оқ уйда ўтказилган C5+1 форматидаги саммитни бу сиёсатнинг амалий ифодаси сифатида баҳолади. Ушбу ташаббус бевосита Овал кабинетдан қўллаб-қувватланаётганини ва келгусида ҳам АҚШ ташқи сиёсатининг диққат марказида қолишини алоҳида таъкидлади.
Бишкекда ўтказилётган форум
Шунингдек, элчи Бишкекда ўтказиладиган B5+1 бизнес форумига ҳам тўхталди. Ушбу тадбир доирасида Қозоғистон, Қирғизистон, Тожикистон, Туркманистон ва Ўзбекистон ҳамда АҚШдан келган йирик тадбиркорлар ва сиёсий доира вакиллари ўртасида учрашувлар ўтказилиши режалаштирилган.
«Мен форумда иштирок этаётган компаниялар рўйхатини кўриб чиқдим ва холисона айтишим мумкинки, бу минтақага ташриф буюрган компанияларнинг энг кенг қамровли рўйхатидир. Келгуси ойлар ва йилларда айнан шундан фойдаланиб иш олиб борамиз. Бу ҳали бошланиши, холос», дея хулоса қилди Сержио Гор.
