Шавкат Мирзиёев ва АҚШ Eksimbank раҳбари стратегик лойиҳаларни муҳокама қилди
Президент Шавкат Мирзиёев Вашингтонда АҚШ Eksimbank раҳбари билан энергетика, авиация, IT ва транспорт соҳаларида молиявий ҳамкорлик йўналишларини белгилаб олди.
6 ноябр куни АҚШга амалий ташриф доирасида Ўзбекистон Президенти Шавкат Мирзиёев Вашингтон шаҳрида АҚШнинг Экспорт-импорт банки (Eksimbank) раҳбари Жон Йовановични қабул қилди. Ушбу институт Америка компанияларининг халқаро иқтисодий фаолиятини молиявий воситалар орқали қўллаб-қувватлайдиган расмий агентлик ҳисобланади.
Учрашув чоғида Ўзбекистон ва Eksimbank ўртасида энергетика, муҳим минераллар, қишлоқ хўжалиги, ахборот технологиялари, транспорт ва бошқа устувор йўналишлардаги йирик қўшма лойиҳаларни молиялаштириш имкониятлари муҳокама қилинди.
Авиапаркни янгилаш ва Boeing самолётларини етказиб беришда Eksimbank’нинг иштирокига алоҳида эътибор қаратилди. Томонлар амалий ҳамкорликни чуқурлаштириш ва узоқ муддатли шериклик режасини ишлаб чиқишга келишиб олдилар.
Ташриф якунида Ўзбекистон Республикаси Инвеститсиялар, саноат ва савдо вазирлиги ҳамда АҚШ Eksimbank ўртасида қўшма лойиҳаларни молиялаштириш бўйича келишув алмашилди. Ушбу битим икки давлат ўртасидаги иқтисодий шерикликни янги босқичга кўтариши кутилмоқда.
Ўзаро ҳамкорликни янада фаоллаштириш орқали АҚШ компаниялари билан стратегик тарзда янги лойиҳаларни йўлга қўйиш, шунингдек, Ўзбекистоннинг инфратузилмавий салоҳиятини мустаҳкамлаш кўзда тутилмоқда.
