Si Jinping iqtisodni ichki bozor orqali jadallashtirmoqchi

Xitoy rahbari Si Jinping mamlakatning eng muhim siyosiy maydonlaridan biri hisoblangan markaziy iqtisodiy ishchi konferensiyasida dasturiy nutq so‘zladi. Unda iqtisodiy o‘sishning asosiy drayveri sifatida ichki talab belgilandi. Nutq dekabr oyida o‘tkazilgan yig‘ilishda yangragan va partiya nashri «Qiushi» rasmiy saytida e’lon qilingan.

Si Jinping iste’molni rag‘batlantirish va investitsiyalarni kengaytirish bo‘yicha sa’y-harakatlarni muvofiqlashtirish zarurligini ta’kidladi. U Xitoyning «ulkan» ichki bozori afzalliklaridan foydalanish muhimligini qayd etdi. Shuningdek, aholi turmush darajasini oshirish va barqaror sarmoya muhitini ta’minlashga alohida e’tibor qaratildi.

«Bloomberg» nashrining qayd etishicha, o‘tgan yili Xitoy iqtisodi 5 foizga o‘sdi. Eksport ko‘rsatkichlari ichki iste’mol pasayishini qoplagan. Shu bilan birga, mamlakat savdo balansi rekord darajada ijobiy saldo qayd etgan, bu AQSH tomonidan joriy etilgan savdo cheklovlariga qaramay sodir bo‘lgan.

Strategik ustuvorliklar

Bayonotda belgilangan ustuvor yo‘nalishlar orasida iste’mol sektorini qo‘llab-quvvatlash, innovatsion tarmoqlarni rivojlantirish va shahar hamda qishloq aholisi daromadlarini oshirish bor. Shuningdek, bazaviy pensiya to‘lovlarini ko‘paytirish va ijtimoiy ahamiyatga ega loyihalarga sarmoya kiritish rejalashtirilgan.

Qo‘shimcha vazifalar iqtisodiyotni sifat jihatdan rivojlantirish, ochiqlik siyosatini davom ettirish va ekologik transformatsiyani tezlashtirishni qamrab oladi. Bozordagi noqonuniy raqobatga qarshi kurashish va ko‘chmas mulk bozorini barqarorlashtirish ham kun tartibida turibdi.

2026 yil moliyaviy siyosati

Hukumat 2026 yilda budjet taqchilligi va davlat xarajatlarini zarur darajada ushlab turishni rejalashtirmoqda. Biroq keng ko‘lamli rag‘batlantiruvchi choralar qo‘llanilmasligi aytildi.

Alohida e’tibor oliy ta’lim bitiruvchilari va mehnat migrantlari bandligiga qaratilmoqda. Geosiyosiy va savdo xavflari kuchaygan sharoitda mamlakat rahbariyati iqtisodiy barqarorlikni ta’minlash uchun ichki bozorni asosiy tayanch sifatida ko‘rmoqda.

Tahlilchilarning fikricha, bu yondashuv yangi sanoat tarmoqlarini rivojlantirish bilan uyg‘un holda amalga oshiriladi.