Starmer iste’fosi yaqinga o‘xshayapti: Epshteyn mojarosi Britaniya hukumatini silkitdi
Epshteyn fayllari atrofidagi yangi oshkor etilishlar Buyuk Britaniya bosh vaziri Kiyr Starmer lavozimini ham xavf ostiga qo‘ydi
Buyuk Britaniya bosh vaziri Kiyr Starmer iste’foga chiqishi mumkin. «Bloomberg» manbalarining xabar berishicha, 2019 yilda vafot etgan moliyachi Jeffri Epshteyn bilan bog‘liq hujjatlar atrofidagi mojaro hukumat ichida jiddiy siyosiy inqirozga aylanmoqda. Starmerning eng yaqin maslahatchilaridan biri — bosh vazir ma’muriyati rahbari Morgan Maksuini iste’foga chiqqan.
Maksuini 2025 yilda Piter Mandelsonni AQSHdagi elchi lavozimiga tavsiya etgani uchun «to‘liq javobgarlik»ni o‘z zimmasiga olgan. Mandelsonning Epshteyn bilan aloqalari avvaldan ma’lum bo‘lganiga qaramay, aynan shu qaror hukumatga nisbatan ishonchni pasaytirgan.
«Bloomberg»ga ko‘ra, ayrim vazirlar Starmerdan ixtiyoriy ravishda lavozimni tark etishni so‘rash yoki o‘zlari iste’foga chiqish orqali bosim o‘tkazish imkoniyatini muhokama qilmoqda. Manbalarga ko‘ra, bosh vazirning haftaning oxirigacha lavozimda qolish ehtimoli 50 foizdan oshmaydi.
Siyosiy oqibatlar
Piter Mandelson o‘tgan hafta Buyuk Britaniya parlamenti Lordlar palatasini tark etdi. Bu qaror hukumat uni perlik maqomidan voz kechishga chaqirganidan keyin qabul qilingan. Shu bilan birga, politsiya unga nisbatan jinoiy tergov boshlab, tintuvlar o‘tkazgan.
AQSH Adliya vazirligi tomonidan e’lon qilingan Epshteynga oid hujjatlarda Mandelson 2009 yilda, biznes ishlari bo‘yicha vazir bo‘lib ishlagan paytida, Epshteyn bilan bankiirlar bonuslariga soliq joriy etish masalasini muhokama qilgani qayd etilgan. Bu ma’lumotlar o‘sha davrda ochiq e’lon qilinmagan edi.
Leyboristlar partiyasi deputati Endi Makdonald BBC efirida chiqish qilib, agar Starmer xatosini ochiq tan olmasa va vaziyatni qanday bartaraf etishini aniq aytmasa, uning siyosiy kelajagi yaqin oylarda yakunlanishini bildirdi.
Mandelsonning shubhali aloqalari
Parlament Mandelsonning elchi etib tayinlanishiga oid hujjatlarni ochiqlash haqida qaror qabul qilgan. Bu qaror oxir-oqibat bosh vazir Kiyr Starmer tomonidan ma’qullangan. Shu jihat uning shaxsiy javobgarligini yanada oshirmoqda.
Ayrim deputatlar Mandelsonning rossiyalik milliarder Oleg Deripaska bilan yaqin aloqalarini ham savol ostiga qo‘ymoqda. Ular davlat sirlari xavfsizligiga doir tekshiruvlar o‘tkazilishi mumkinligini istisno qilmayapti.
Mojaro nafaqat hukumat ichida, balki jamoatchilik orasida ham ishonch inqiroziga sabab bo‘lmoqda. Yaqin kunlarda Starmer qanday qaror qabul qilishi Britaniya siyosiy barqarorligi uchun hal qiluvchi ahamiyat kasb etadi.
