Suzish havzalarini qurish xarajatlari qoplab beriladi

O‘zbekistonda yangi zamonaviy suzish havzalari qurish va ishga tushirish bilan bog‘liq xarajatlarning bir qismi davlat tomonidan qoplab beriladi. Hukumatning 27-yanvarda qabul qilingan 29-son qarori bilan ushbu yo‘nalishda davlat xizmatini ko‘rsatishning ma’muriy reglamenti tasdiqlandi.

Qarorga muvofiq, xarajatlarni qoplash mexanizmi talabgorlar tomonidan taqdim etilgan dastlabki 100 ta suzish havzasiga nisbatan amal qiladi.

Kompensatsiya miqdori va muddati

Belgilangan tartibga ko‘ra, 2026 yil 1-fevraldan 2028 yil 1-yanvargacha tashkil etilgan suzish havzalari uchun xarajatlarning 50 foizigacha qismi qoplab beriladi. Biroq ajratiladigan mablag‘ har bir loyiha uchun 100 million so‘mdan oshmasligi shart. Mazkur chora xususiy investitsiyalarni rag‘batlantirish va aholi uchun sport infratuzilmasini kengaytirishga qaratilgan.

Talabgorlarga qo‘yiladigan shartlar

Kompensatsiya olish uchun murojaat qiluvchi yuridik shaxslar bir qator talablarga javob berishi lozim. Xususan, soliq va yig‘imlar bo‘yicha qarzdorlik mavjud bo‘lmasligi, qayta tashkil etish yoki tugatish jarayonida turmasligi, faoliyati qonunchilik asosida vaqtincha to‘xtatilmagan bo‘lishi kerak. Shuningdek, sud qarori bilan to‘lovga qobiliyatsiz deb e’lon qilingan korxonalar ushbu dasturda ishtirok eta olmaydi.

Ariza berish tartibi

Talabgorlar xarajatlarni qoplash uchun Davlat xizmatlari markazi yoki YAIDXP orqali Turizm qo‘mitasiga ariza taqdim etadi. Arizaga suzish havzasining loyiha hujjatlari, qurilish va ishga tushirish bo‘yicha tuzilgan pudrat shartnomasi hamda shartnoma asosida amalga oshirilgan to‘lovlarni tasdiqlovchi elektron hujjatlar ilova qilinadi.

Mablag‘larni ajratish muddati

Turizm qo‘mitasi tomonidan ijobiy qaror qabul qilingan taqdirda, mablag‘lar qaror qabul qilingan kundan boshlab 10 ish kuni ichida talabgorning hisobvarag‘iga o‘tkazib beriladi.